Ирон фæндырмæ уарзондзинад Цорæты-Бедойты Жаннæйы зæрдæйы æрцард, фондз азы йыл куы цыд, уæд.
– Мæ ныййарджытимæ чындзæхсæвмæ ацыдтæн, æмæ уым сылгоймæгтæ афтæ рæсугъд цагътой, æмæ мæн дæр бафæндыд, – дзуры йæ сабибонты мысинæгтæ Жаннæ.
Уыцы чындзæхсæвæй фæстæмæ сабийы зæрдæйы æрцард ирон фæндыр. Йæ фыццаг фæлварæнтæ та акодта йæ нана Гæгæрцаты Лизаветы зæронд «Казань»-ыл. Фæстæдæр суинаг чызг йæ ныййарджытимæ Уæллаг Зджыдæй Дзæу-
джыхъæумæ куы ралыгъд, уæд райста профессион ахуырад. Сарæзта йæ цард дæр. Хъомыл кæны дыууæ фырыхъулы хуызæн лæппуйы – Ирбег æмæ Махарбеджы, чызг Дзерассæйы, у аивадон къорд «Фæндыры зæлты» аразæг æмæ йæ разамонæг.
Жаннæ æнтыстджынæй каст фæци музыкалон скъола æмæ 1999 азы культурæйы колледж. Уым ын йæ ахуыргæнджытæ цы арф зонындзинæдтæ радтой, уыдон абон дæр сты йæ зæрдæйы, баззадысты йæ арæхстджын æнгуылдзты. Æмæ куыннæ! Фæндырдзагъды бæрзæндтæм кæй фæрцы хизы, уыцы фыццаг ахуыргæнджытæ сты – Магаты Никъала æмæ Ногъайты Маринæ. Никъала кæд домаг ахуыр-
гæнæг уыд, уæддæр-иу йæ уроктæй Жаннæ ацыд куклатимæ, афтæ йын
ахуыргæнæг аргъ кодта йæ музыкæмæ уарзондзинад æмæ арæхстдзинадæн. Суанг ма йын йæ ныййарджытæм дæр бахатыдта, цæмæй Жаннæйы йæ ахуырæй ма бакъуылымпы кæной. Стæй уæд курдиатджын чызг бахаудт дæсны фæндырдзæгъдæг УФ-йы сгуыхт артисткæ Реуазты Симæйы курсмæ. Ам чызгæн йæ курдиат райхæлд æмæ сæрттывта ног ахорæнтæй.
– Симæ уыд дæсны ахуыргæнæг, фæлмæн адæймаг. Рæстæг раздахæн куы уаид, уæд ма ноджы иу хатт бацыдаин ахуыр кæнынмæ Реуазты Симæмæ, – зæгъы Цорæты Жаннæ.
Ацы аз йæ аивадон къорд «Фæндыры зæлтыл» сæххæст уыдзæн дæс азы. Уыцы рæстæг æнцонтæй рахонæн нæй. Абон тынг бирæ сты алыхуызон музыкалон къордтæ. Се ‘хсæн дын хъуамæ уа хи сфæлдыстадон æрмдзæф, иннæтæй дæ чи хицæн кæна, ахæм. Æмæ Жаннæйæн уый бантыст. Зонынц æй аивады архайджытæ канд нæ
республикæйы нæ, фæлæ ма сыхаг республикæты дæр. Жаннæ арæх цæуы æмæ парахат кæны ирон музыкалон аивад. Цæцæны Республикæйы сгуыхт артист Адам Мунашевимæ сарæзта цалдæр зæрдæмæдзæугæ музыкалон дуэты. Арæх архайы хæрзаудæн концертты. Бирæ артисттæ ахæм гуманитарон акцитæм кæд зивæггæнгæ цæуынц, уæд дзы Жаннæ та зæрдиагæй архайы. Къорд хатты уыд Дзæуджыхъæуы æфсæддон госпитæлы хæрзаудæн концертты Театралон архайджыты цæдисимæ. Йæ фæндыры цагъдæй йæ зонынц 58-æм Æфсады дивизиты дæр. Арæх сæ бабæрæг кæны цыбыр сфæлдыстадон программæимæ, йемæ ма «Салдæтты мадæлты» комитеты регионалон хайады разамонæг Моурауты Зæлинæ, афтæмæй.
Жаннæ зæрдæйæ уарзы ирон аивад, у æргомдзырд адæймаг, æмæ йæ уый иу рæстæг акодта рæстдзинад ссарыны фæндагыл. Сыхаг республикæйы паддзахадон ансамбль сæ концертты рæстæг сæ кафт «Удж» рахуыдтой, куыд сæ адæмон кафт, афтæмæй та йæ мелодийæ дæр, кафты ныв æмæ иннæ хицæндзинæдтæй уыд ирон «Симд»-ы халдих. Жаннæ йе ‘мцæдисонтимæ агурын райдыдта кæфтыты истори музейы, архивты, ныхас кодтой хореографтимæ, рæстдзинад агурæг цыдысты нæ республикæйы Культурæйы министрадмæ. Фæндыд сæ, цæмæй нæртон симд гуырысхойаг мачи кæна, ирон кафт кæй у йæ равзæрдæй, уымæй. Æппынфæстаг, ацы фарстмæ йе ‘ргом раздæхта цæгатирыстойнаг гуманитарон æмæ социалон иртæстыты институт, суанг ма блогертæ дæр. Фæндыд сæ, цæмæй симдæн закъоны бындурыл лæвæрд æрцæуа сæрмагонд патент, фæлæ, адæмон кафт кæй у, уый тыххæй сын нæ рауад. Уый хыгъд, «Симд» нымад æрцыд Уæрæсейы æнæматериалон хæзна-
йыл.
Хæдзары æфсин, кæстæрты мад, уарзæгой чызг, хо, – ацы æмбарынæдтæ Жаннæйы царды ахсынц стыр бынат. Йæ рæстæджы фылдæр хай дæтты йæ хъæбултæн. Фырттæ Ирбег æмæ Махарбег сты фидæны Фыдыбæстæ хъахъхъæнджытæ. Бирæ хæттыты Жаннæ, Ныййарджыты комитеты уæнг уæвгæйæ, суворовонты скъолайы, афтæ архайдта семæ гуманитарон мадзæлтты. Æрæджы дæр та йæ хъæппæрисæй йæ кæстæр лæппу Махарбег æмæ йе ‘мбæлттæ æрзылдысты Джызæлы уынгты æмæ сæмбырд кодтой 300 кг макулатурæ. Уыцы ‘хцайæ йын балхæндзысты хъæугæ техникон кусæнгарз, кæцы æрвыст æрцæудзæн сæрмагонд æфсæддон операцийы хæстонтæн.
Йæ сабидуджы Жаннæ бахаудта фæндыры зæлты уацары æмæ абон дæр йæ зæрдæйы ахаст ууыл нæ ивы. Йæ алы цагъдæй дæр, йæ фæрнджын архайдæй, йæ аив бакастæй фæндаг агуры адæмы зæрдæтæм. Мах дæр фæнды, цæмæй Жаннæйæн йæ фидæн уа йæ фæндырдзагъды хуызæн рæсугъд æмæ зæрдæрайгæ!
МАМИАТЫ Лолитæ
