Беслæны 20 азы размæ цы стыр фыдбæллæх æрцыд террористты аххосæй, уый амæттæгтæ рох кæй не сты æмæ нæ уыдзысты, уымæн æвдисæн – нæ бæстæйы алы рæтты цы мадзæлттæ арæзт æрцыд, уыдон.
Афтæ, Хабаровскы цæрджытæ дæр æрæмбырд сты Намысы фæзы – уым арæзт æрцыд митинг-концерт. Архайдтой дзы Хабаровскы филармонийы камерон паддзахадон ансамбль «Глория» æмæ Хабаровскы Культурæйы паддзахадон институты студенттæ. Йæ сæйраг символ уыд, цæрджытæ урс лентытæ кæуыл бабастой, уыцы бæлон.
Мадзалы сфæлдыстадон хайы фæстæ Намысы фæзмæ чи ‘рбацыд, горæты уыцы цæрджытæ ссыгътой мыдадзын цырæгътæ æмæ сæвæрдтой дидинджытæ «Хæстон намысы горæт»-ы стелæйыл. Алчидæр дзы, æнæмæнг, банкъардта, граждайнаг иудзинад фидар кæнын кæй хъæуы, стæй алы адæмыхæттыты кæрæ-дзи æмбарынад терроризмы ныхмæ тохы.
«Тынг стыр ахадындзинад ис, Терроризмы ныхмæ тохы иудзинады æппæтадæмон бон æмæ, Беслæны фыдбæллæхы чи бацарæфтыд, уыдоны мысæн бонæн. Уый не ‘ппæты дæр æнгом кæны иу нысан сæххæст кæнынмæ – хъæддых лæууын терроризм æмæ экстремизмы ныхмæ, цæрынæн æдасдзинад æмæ сабырдзинады уавæртæ саразынмæ æппæт дунейы», – загъта митинджы йæ раныхасы Республикæ Цæгат Ирыстон-Аланийы Иудадзыгон минæвар Дардскæсæн федералон зылды, Хабаровскы крайы æхсæнадон организаци «Хабаровскы крайы адæмты ассамблей»-ы сæрдары хæдивæг Хидирты Валери.
ГАПБАТЫ Алетæ
