Уæрæсеимæ Ирыстоны иукæнынадыл 250 азы, цæгатирыстойнаг республикæйы расидтыл та 100 азы кæй æххæст кæны, уый кадæн 7 сентябрæй 17 сентябры онг Мæскуыйы Останкинойы телемæсыгыл фæзындзысты ироны тырысайы урс, сырх æмæ бур хуызтæ.
Ацы хабар Цæгат Ирыс-тоны Сæргълæууæг Сергей Меняйло фехъусын кодта йæ телеграм-каналы. Ирон национ музыкæ зæлдзæн, кафджытæ та кæндзысты адæмон кæфтытæ, афтæмæй 7 сентябры 17 сахатыл Останкинойы мæсыгыл судзын райдайдзысты ирон тырысайы хуызтæ.
Бæрæгбон сфидаудзæн зындгонд оперон зарæггæнæг Сланты Тимуры зарджытæй. Юбилейон бæрæгбоны программæмæ гæсгæ чи ацæудзæн, Останкинойы мæсыджы медиа-фарсыл æрæвæрдзысты Цæгат Ирыстоны Тæбæхсæуты Балойы номыл паддзахадон академион театры уыцы гастролон балцы тыххæй ролик. Ирыстойнаг артисттæ Мæскуыйы Чысыл театры равдисдзысты спектакль «Къарол Лир», А.С. Пушкины номыл драмон театры – «Овод», Е.Б. Вахтанговы номыл театры та – спектакль «Гæздæнтæ»-йы премьерæ.
Нæ уацхæссæг
