Национ проект «Ахуырад»-ы бындурыл Беслæны арæзт æрцыд ног 9-æм скъола. Знон кадджын уавæрты фыццаг хатт уæрæх байгом кодта йæ дуæрттæ 550 скъоладзауæн.
Сывæллæтты рухс бæрæгбонмæ æрцыдысты РЦИ-Аланийы Хицауады Сæрдары хæдивæг Платы Альбинæ, РЦИ-Аланийы ахуырад æмæ наукæйы министр Алыбегты Эллæ æмæ Рахизфарсы районы муниципалон сконды сæргълæууæг Фрайты Сослан. Скъола у æхсæзуæладзыгон, дих кæны иу, дыууæ æмæ æртæ уæладзыгон бæстыхæйттыл. Æрмæст йæ спортивон, актон æмæ хæрæндоны залтæ арæзт сты 300 адæймагæн. Скъолайы иумæйаг фæзуат у 8812,3 квадратон метры, ногдæр æмæ ахъаззагдæр ифтонггæрзтимæ. Спортивон зал дих кæны дыууæ хайыл – стыр æмæ чысыл гимнастикон залтыл. Стыр залы фæзуат фадат дæтты ацы ран канд районы нæ, фæлæ республикон æмвæзадыл ерыстæ аразынæн, суанг мини-футболæй дæр. Спортивон залты ис уæлæдарæс раивынæн сæрмагонд хатæнтæ, хинайæнтæ æмæ хи сыгъдæг дарынимæ баст æндæр уавæртæ.
Сколайы 33 кабинетæй 1 у физикæйы, 1 – химийы, 1 – биологийы, 2 кабинеты та – информатикæйы, 1 – хъуымæцитæ кусыны кабинет, дарддæр дзы ис хæдзарад, хъæд æмæ æфсæйнаджы куыстгæнæн æрмадзтæ, алыхуызон рекреацион къордтæ æмæ, фæсуроктæ сывæллæттæ дарддæр ахуыргæнæгимæ сæ рæстæг кæм æрвитдзысты, ахæм къорд. Йæ материалон-техникон бындур амоны, ацы ран физкультурон-спортивон æмæ аивадон-техникон уæлæмхасæн ахуырады программæтæ æххæст кæнынæн гæнæнтæ. Директорæй та дзы нысангонд æрцыд УФ-йы ахуырады кадджын ахуыргæнæг, 2020 азы конкурс «Афæдзы ахуыргæнæг» Цорæты Зитæ. Уымæй уæлдай, скъолайы кусдзæн 19 ахуыргæнæджы, уыдонæй 5 – уæлдæр категорийы педагогтæ.
Кадджын линейкæйы Платы Альбинæ арфæ ракодта сывæллæттæ,
ахуыргæнджытæ æмæ ныййарджытæн:
– Фыццаджыдæр мæ бузныджы ныхæстæ зæгъын фæнды нæ бæстæйы Президент Владимир Путинæн. Беслæны рæзты генералон пъланы бындурыл Президент бахæс кодта ацы районы ног скъолайы арæзтад. Нæ республикæйы Сæргълæууæг Сергей Меняйло скъолайы арæзтадмæ биноныг йæ цæст дардта, æмæ абон ног рæсугъд скъола æнхъæлмæ кæсы йæ хъомылгæнинæгтæм,– загъта нæ республикæйы Хицауады Сæрдары хæдивæг.
Скъоладзаутæн арфæ ракодта Фрайты Сослан дæр.
– Бирæ æргом здæхт цæуы нæ районмæ. Беслæны рæзты паддзахадон программæйы бындурыл районы æппæт социалон объекттæ цæуынц бындурон цалцæг, бирæ ног
бæстыхæйттæ арæзт, æмæ уыцы хъуыддæгтæ – иууылдæр нæ республикæйы разамынды фæрцы. Ацы скъола дæр уыцы генералон пъланы фарстатæй иу уыд. Ахæм уавæрты ахуыр кæнын зын нæу, ис æппæт фадæттæ дæр, цæмæй нæ сабитæ рæзой амондджынæй, зæрдæрухсæй. Сомбон йæ къæсæрæй чи рахиза, уыцы рауагъдонтæ та, Хуыцау зæгъæд, æмæ суæнт зындгонд ахуыргæндтæ, инженертæ, дохтыртæ, – загъта Фрайы-фырт.
Саутæты Тамилæ
