Цыппар мин кусæг цæгатирыстойнаг ныййарæгæй фылдæр исынц 1,5 азæй кæстæр сывæллонмæ зилыны фæдыл пособи.
– Ацы аз 1,5 азæй кæстæр сывæллонмæ зилыны фæдыл пособи фидыны фæтк фæивта. Декретон отпусчы чи ис, амæй размæ пособи фыстой æрмæст ахæм адæймæгтæн, ныр та отпускæй æмгъуыдæй раздæр рацæуæг ныййарджытæ дæр пособи исыны барæй нæ фæцух уыдзысты. Æнæххæст кусгæ бон, хæдзармæ куыстмæ æмæ дæрддзæгмæ куыстмæ чи рацæуа, ног фæтк ахæм адæймæгтыл дæр æххæссы, – зæгъы Уæрæсейы Социалон фонды цæгатирыстойнаг хайады разамонæг Таболты Сергей.
Уæ зæрдыл уын лæууын кæнæм: кусæг æмæ нæкусæг ныййарджытæн пособийы бæрц бæлвырд кæныны фæтктæ кæрæдзийæ хицæн кæнынц. Кусæг ныййарджытæн сабимæ зилыны фæдыл пособийы бæрц вæййы раздæры дыууæ азæн рæстæмбис мызды 40 проценты бæрц (фæлæ Цæгат Ирыстоны территорийыл 8591,47 сомы бæрц чи у, пособийы бæрц уыцы тæккæ къаддæр бæрцæй дæлдæр хъуамæ ма уа). Ацы азы райдайæнæй нырмæ мæймæ пособийы æппæты стырдæр бæрц у 49123,12 сомы.
Нæкусæг ныййарджытæн ис сывæллонмæ зилыны фæдыл пособи исыны, кæнæ та иумæйаг пособийæн гæххæттытæ саразыны бар. Уымæй уæлдай, нæкусæг адæймæгтæн уыцы-иу рæстæг сывæллонмæ зилыны æмæ æгуыстдзинады фæдыл пособитæ исыны бар нæй. Æрвылмæйон пособийæн гæххæттытæ саразынæн кусæг ныййарджыты хæс у куысты бынаты кадрты хайадмæ, кæнæ та бухгалтеримæ æмбæлгæ курдиат бадæттын. Нæкусæг ныййарджытæн ис фиддоны фæдыл портал «Госуслуги»-мæ, бирæкъабазджын центрмæ, кæнæ та бæстæйы Социалон фонды цæгатирыстойнаг хайады клиентон службæтæм бахатыны бар.
УФ-йы Социалон фонды
цæгатирыстойнаг хайады пресс-службæ
