Уæрæсейыл цыппар ног регионы – Донецкы æмæ Луганскы адæмон респуб-
ликæтæ, Запорожье æмæ Херсоны облæсттæ – куыд бафтыд, ууыл рацыд дыууæ азы. Уыцы кадджын цауы фæдыл знон Хæлардзинады хæдзары уыд диссаджы бæрæгбон – «Мы вместе».
Æмæ, æцæгæйдæр, дыууæ азы размæ 30 сентябры цыппар регионы цæрджытæ цы куырыхон æмæ раст уынаффæ рахастой, уымæй баиу кодтой сæ хъысмæт Уæрæсейы æппæт адæмы хъысмæтимæ. Уыцы бонæй фæстæмæ 30 сентябрь ссис нæ иумæ-
йаг бæрæгбон, рæстдзинад æмæ æнгомдзинады бæрæгбон.
Ахæм рæсугъд бæрæгбон саразыны нысан уыд адæмы историон рæстдзинад бахъахъхъæнын, кæстæрты граждайнаг-патриотон бындуртыл хъомыл кæнын, Уæрæсейы цæрæг бирæ адæмыхæттыты культурон æмæ историон бынтæ бахъахъхъæнын.
Æппæт уыдæтты фæдыл уыдысты сæ арфæйы ныхæстæ бæрæгбоны архайджытæ æмæ уазджытæн, се ‘хсæн уыдысты: РЦИ-Аланийы национ политикæ æмæ æддагон бастдзинæдты фæдыл министры фыццаг хæдивæг Андрей Бессонов, УФ-йы Фæсарæйнаг хъуыддæгты фæдыл министрады минæвар Дзæуджыхъæуы Багир Мамиев, нациты ‘хсæн регионалон æхсæнадон змæлд «Нæхи Ирыстон»-ы сæрдар Лагкуты Вячеслав, РЦИ-Аланийы Парламенты национ политикæ æмæ фæсивæды хъуыддæгты фæдыл комитеты сæрдар Джиоты Георги, сæрмагонд æфсæддон операцийы архайджытæ, горæт Дзæуджыхъæуы бынæттон хиуынаффæйады администрацийы, уæлдæр ахуыргæнæндæтты, æхсæнадон организациты минæвæрттæ, ахуырдзау фæсивæд.
Раныхасгæнджытæ куыд дзырдтой, афтæмæй дыууæ азы размæ 30 сентяб-
рæй фæстæмæ Донецкы æмæ Луганскы адæмон республикæтæ, Запорожье æмæ Херсоны облæстты цæрджытæ Уæрæсейы Федерацимæ бацæуыныл сæ иумæйаг фæндон куы равдыстой, уыцы бонæй фæстæмæ милуангай адæмæн сæ зæрдæтæ барухс сты сомбоны ныфсæй, милуангай адæм æрыздæхтысты сæ историон бинонтæм. Кæй зæгъын æй хъæуы, уый æнцон æмæ хуымæтæг юридикон санчъех нæ уыд. Уый уыд, уæззау сæрызондæй чи рацыд, ахæм раст уынаффæ, сабырдзинад, æдас-
дзинад æмæ цытджын Уæрæсеимæ иудзинад чи равзæрста, уыцы адæмы куырыхон уынаффæ.
Куыд Уæрæсейы иннæ регионтæ, афтæ Цæгат Ирыстон дæр аккаг бавæрæн хæссы, ног фæзуæттæ сæ къæхтыл цæмæй фидар слæууой, уыцы хъуыддагмæ – нæ арм дарæм Запорожьейы облæсты Черниговы районыл. Ирыстойнаг кусджытæ дзы аразынц скъолатæ, рæвдауæндæттæ, цæрæнуатон-коммуналон хæдзарады кусæндæттæ. Cе ‘нæниздзинад фæхуыздæр кæныны тыххæй нæм уырдыгæй æрбацæуынц, куыд хистæр кары адæймæгтæ, афтæ сывæллæттæ дæр. Æмæ нырæй фæстæмæ не ‘нгомдзинад, нæ хæлар ахастытæ азæй-азмæ кæндзысты фидардæр æмæ рæсугъддæр.
Бæрæгбоны архайджытæн сæ зæрдæтæ барухс кодтой нæ республикæйы сфæлдыстадон къордтæ æмæ аивады архайджытæ.
ДЕДЕГКАТЫ Зæлинæ,къамтæ систа
Татьянæ Шеходанова
