РЦИ-Аланийы Сæргълæууæг Сергей Меняйлойы разамындæй уыд радон æрвылкъуырион аппаратон æмбырд. Архайдтой дзы нæ республикæйы Хицауад, ведомствæтæ æмæ муниципалон скондты разамонджытæ.
Оперативон уавæры тыххæй доклад скодта РЦИ-Аланийы Хицауады Сæрдары хæдивæг Икъаты Русланбег. Куыд радзырдта, афтæмæй Цæгат Ирыстоны фæзуатыл зынгсирвæзтыты цаутæй тæссагдзинады уавæр нæма банывыл. Æнæнхъæлæджы уавæрты министрады цæгатирыстойнаг управленийы кусджытæ развæлгъау мадзæлттæ аразынц зынгсирвæзтытæ ма ‘руадзыны хъуыддаджы.
Зымæгмæ цæттæдзинады фарста куыд æххæстгонд цæуы, хъармгæнæн æмæ иннæ фæрæзтæдæттæг организациты куысты тыххæй бæлвырд хатдзæгтæ скодта РЦИ-Аланийы цæрæнуатон-коммуналон хæдзарады, артаг æмæ энергетикæйы министр Таматы Майрæн. Куыд загъта, уымæ гæсгæ абоны онг нæ республикæйы социалон объекттæ æмæ бирæфатерон хæдзæртты хъармгæнæн
системæ зымæгмæ у цæттæ. Кæй зæгъын æй хъæуы, хæдзарады ис лыггæнинаг
фарстатæ дæр æмæ уыдоныл архайынц фæлтæргай.
Сергей Меняйло Тамайы-фырты бафарста, æнæхицау энергион объекттæ сбæрæг кæныны фарстайыл куыд бацархайдтой, уымæй. Министр бацамыдта, нæ республикæйы районты æппæт скъолатæ, сывæллæтты рæвдауæндæттæ, рынчындæтты разамонджытæм фыстæджытæ кæй арвыстой, сæ фæзуатыл
рухсдæттæн æнæхицау дæлстанцæтæ ис, æви нæ, уый сбæлвырд кæныны тыххæй.
– Абоны онг уал нæм дзуапп æрбарвыстой Æрæфы æмæ Мæздæджы районтæ. Куыд базыдтам, афтæмæй ахæм дæлстанцæтæ амынд фæзуатыл ис 17, уыдонæй 2 – æнæхицау. Мах архайæм, уыцы æнæхицау объекттæ кæй хыгъды сты, уый базоныныл, – загъта Таматы Майрæн.
– Цыколайы 3-æм астæуккаг скъолайы, Толдзгуыны, Урухы социалон объектты фæзты дæр разындис ахæм æнæхицау дæлстанцæтæ, кæй сты, чи дæтты
дзуапп ацы трансформатортæн, скъолайы директортæ æви завучтæ? Кæдмæ сæм кæсдзыстут, цалынмæ та радон фыдбылыз æрцæуа, уæдмæ? Дыууæ боны уын дæттын, цæмæй ацы фарста нывылгонд æрцæуа, – загъта Сергей Меняйло. Уымæй уæлдай, ныхас рауад Дзæуджыхъæуы бирæ уынгты быронкалæн контейнертæ кæй систой æмæ адæм сæ бырон кæдæм рахæссой, уый нал ис. Сæ хъаст бахастой нæ республикæйы Сæргълæууæгмæ. Сергей Меняйло Таматы Майрæн æмæ Дзæуджыхъæуы мэр Милдзыхты Вячеславæн бахæс кодта, фарста
æвæстиатæй алыг кæнын.
Милдзыхы-фырт куыд бамбарын кодта, афтæмæй контейнертæн сæ фылдæр адæм сæхæдæг нæ уадзынц сæ фæзуæтты.
– Бафæдзæхстам ногдæр хуыз контейнертæ æмæ нын сæ кæд æрбарвит-
дзысты, уымæ æнхъæлмæ кæсæм, – загъта горæты сæргълæууæг.
– Контейнертæ кæд айстат, уæд сын сæ бынаты æндæр мадзæлттæ саразут, адæм хъуамæ сæ бырон кæдæм калой? Æмгъуыд уын иунæг бон дæттын, цæмæй ацы хъуыддаг банывыл кæнат, – загъта Сергей Меняйло.
Аппаратон æмбырды ныхас цыдис коммуналон фиддонтыл дæр. Доны хæдзарады генералон директор Хъараты Тимур радзырдта, абоны онг 100 милуан сомы хæстæ кæй дарынц бюджетон къабазы организацитæ. Нæ республикæйы Сæргълæууæг ацы ведомствæйы разамонæгæн бацамыдта, номхыгъдтæ саразын æмæ алы организацийæ дæр карзæй бадомын, закъоны бындурыл сæ хæстæ фидыны хъуыддаг.
РЦИ-Аланийы «Роспотребнадзор»-ы разамонæг Тыбылты Алан та доклад бацæттæ кодта нæ республикæйы санитарон-эпидемиологон уавæры фæдыл. Куыд загъта, афтæмæй хæцгæ низтæ æмæ коронавирусæй рынчын адæмы нымæц æнæнхъæлæджы фæбæрзонддæр, фæлæ рынчынтæн ис æппæт мадзæлттæ дæр сæхи дзæбæх кæнынæн.
7, 8, æмæ 9 октябры Мæскуыйы, Федерацийы Советы, ацæудзысты Ирыстоны бонтæ. Уыцы бæрæгбæттæм Сергей Меняйло бахæс кодта, равдыст биноныг бацæттæ кæнын, цæмæй хъуыддаг бæрзонд æмвæзадыл ацæуа, уый тыххæй.
Саутæты Тамилæ
