Парти «Иугонд Уæрæсе»-йы Цæгат Ирыстоны æхсæнадон иузæрдион-
дзинады штабы уыд проект «Вне времени»-йы презентаци. Йæ нысан у ирон адæмы национ культурæйы музыкалон инструменталон хæзна – хъисфæндыр цардмæ раздахын æмæ йыл кадæг кæныны культурæ æмæ цæгъдыны аивад фæлтæрты ‘хсæн рапарахат, æмæ фæсивæды цæгъдын ахуыр кæнын.
Проект царды уагъд цæуы Уæрæсейы Федераци æмæ нæ рес-
публикæйы Культурæйы министрадты, Цæгат Ирыстоны паддзахадон филармони, Абайты Васойы номыл гуманитарон æмæ социалон иртасæнты институты хъæппæрисæй.
Проекты нысантæ куыд æххæстгонд цæуынц, уымæ цæстдарджытæ сты: чиныгуадзæг Наталья Провоторова, нæ республикæйы Театралон архайджыты цæдисы сæрдары хæдивæг Пагæты Фатимæ æмæ Цæгат Ирыстоны паддзахадон филармонийы ирон адæмон инструментты паддзахадон оркестр «Ирыстон»-ы аивадон разамонæг æмæ дирижер Ходы Олег, журналист Альбинæ Хант-Магомедова.
Презентацийы рæстæг проекты тыххæй радзырдтой: Наталья Провоторова, Ходы Олег, паддзахадон филармонийы директоры хæдивæг Бидыхты Еленæ æмæ ацы рæнхъыты автор.
Проект «Вне времени»-мæ гæсгæ уагъд æрцæудзæн чиныг «Хъисфæндырæй цæгъдыны ахуырады скъола», йæ автор – Ходы Олег. Йæ презентацитæ арæзт æрцæудзысты Дзæуджыхъæу æмæ республикæйы районтæ æмæ хъæуты. Ходы Олег культурæйы артдзæстытæ æмæ инструменталон къордты разамонджытæн, хæдахуыр музыканттæн сараздзæн хъисфæндырæй цæгъдыны дæсныйад æвдисæг ахуыртæ, оркестр «Ирыстон»-ы музыканттæ та равдисдзысты фыдæлтыккон музыкалон уацмыстæй арæзт концерттæ.
Презентацийы рæстæг сæ курдиат æмæ аивад ирон рагон музыкалон инструменттæй цæгъдынæй равдыстой Ходы Олег æмæ оркестр «Ирыстон»-ы музыканттæ.
Гасанты Валери, къам систа
Татьянæ Шеходанова
