Ноябры кæрон Мæскуыйы облæсты йæ куыст кæн-дзæн æхсæзæм æппæтуæрæсеон форум «Дигория». Куыд амæй размæ азты, афтæ та ныр дæр мадзалмæ æрбамбырд уыдзысты, æхсæнадон-политикон æмæ социалон-гуманитарон къабæзты чи кусы, уыцы æрыгон ахуыргæндтæ, эксперттæ, политологтæ, æндæр специалисттæ.
Форум «Дигория»-йæн бындур æвæрд æрцыд 2019 азы. Уæд фыццаг ахæм æмбырд арæзт æрцыд Цæгат Ирыстоны, Уæллаг Фыййагдоны. Уæд уыцы зонадон-практикон мадзалы архайджытæ уыдысты, социалон-гуманитарон нысаниуæджы дæсныйæдтыл чи ахуыр кодта, уыцы студенттæ, стæй æхсæнадон-политикон къабазы кусæг æрыгон специалисттæ.
Дыккаг форум сарæзтой, йæ номæн ын кæй равзæрстой, уыцы хæххон Дыгуры. Уæд æмбырды программæ зынгæ фæуæрæхдæр: кусын дзы райдыдтой фæсивæдон наукон-иртасæн лабораторитæ, авторон къордтæ форуммæ бавдыстой цымыдисаг æмæ ахадгæ технологон-коммуникацион проекттæ… Фæстæдæр нысангонд æрцыд сæрмагонд преми «Дигория» дæр (лæвæрд цæуы, æхсæнадон-политикон æмæ социалон-гуманитарон къабæзты ахсджиаг проекттæ чи æххæст кæны, уыцы политологтæ æмæ иннæ специалисттæн). Азæй-азмæ зынгæ рæзы йæ архайджыты нымæц, стæй йæ географи дæр.
Афтæмæй форум дард акъахдзæф кодта Ирыстоны арæнтæй – фæстаг азты йæ сарæзтой Нижний Новгород æмæ Сочийы. Ацы азы форум та цæудзæн
Мæскуыйы облæсты, разамынды управлени «Сенеж»-ы æрмадзты. «Дигория» бацæттæ кæныныл кусынц Социалон иртæстыты экспертон институт æмæ Фæсивæды хъуыддæгты фæдыл федералон агентады минæвæрттæ. Ныридæгæн бирæ æрыгон политологтæ æмæ æндæр специалисттæ курдиæттæ балæвæрдтой форумы архайджытæ суæвыны фæдыл. Уымæй уæлдай, æрыгон спциалистты къордтæ сæ проекттæ балæвæрдтой сæрмагонд къамисы тæрхонмæ… Форумы цæттæгæнæг комитеты «Рæстдзинад»-æн куыд фехъусын кодтой, афтæмæй ацы аз преми «Дигория» лæвæрд цæудзæн æртæ номинацийы: «Политикон иртæстытæ», «Политикон технологитæ» æмæ «Политикон коммуникацитæ».
Æнтыстджын у, «Дигория»! Æрыгæтты æрмдзæф
бæстæйы фæрныгдæр фидæнæн ахъаз кæй фæуы-
дзæн, ууыл нæ зæрдæ дар-дзыстæм.
СЛАНТЫ Аслан
