Нырыккон æхсæнады минæвæртты уæлдай, арæхдæр цы низыхæттытæ батыхсын кæнынц, уыдонæй иу у варикоз. Уыимæ, уыцы низ фылдæр хъыгдары сылгоймæгты (экспертты бæрæггæнæнтæм гæсгæ, ацы низыхатт рабæрæг вæййы сылгоймæгты 89 æмæ нæлгоймæгты 66 процентмæ). Куыд ис хи бахъахъхъæнæн уыцы низæй? Нырыккон медицинæ цавæр фадæттæй пайда кæны варикозимæ тохы хъуыддаджы? Уыдæтты тыххæй «Рæстдзинад»-æн радзырдта дадзинты хирург æмæ флеболог, Санкт-Петербурджы А.Алмазовы номыл Национ медицинон иртасæн центры ординатурæйы рауагъдон, Уæрæсейы зæрдæйы-дадзинты хирургты ассоциацийы уæнг ХÆМЫЦАТЫ Зауырбег:
– Варикозы низ арæхдæр фæзыны адæймаджы зæнгтыл – тугдадзинтæ барæсийынц æмæ ныннæрсынц, фæзыны сæ лыстæг æлхынцъытæ, туг хуызæнæн нал фæзилдух кæны. Бирæтæ зæгъдзысты, ома, уый фылдæр фæзыны зæнгты аивдзинадыл. Фæлæ уыцы уавæр косметологимæ дард у, варикоз, йæ тæссагдзинадмæ гæсгæ, равæрæн ис инфаркт æмæ инсульты æмрæнхъ. Иуныхасæй, ацы низыхатт домы бæстон цæстдард æмæ ахадгæ дзæбæхгæнæн мадзæлттæ.
Амынд низыхаттæн йæ сæйрагдæр тæссагдзинад у, дадзинты мидæг туджы къуыбæрттæ кæй фæзыны, уый. Уыцы æууæл расайы тромбофлебит. Уымæй уæлдай, уæлдæр цы низты кой скодтон (ома, инфаркт æмæ инсульт), уыдонмæ дæр æркæны адæймаджы.
Адæймагмæ варикоз кæй фемхиц, уый рахатæн ис ахæм æууæлтæй: зæнгтæ ныууæззау вæййынц, къæхтæ риссын райдайынц, зæнгтыл алыхуызон тæппытæ фæзыны, дадзинтæ радымсынц, нуæрттæ фелхынцъ вæййынц… Ацы æмæ иннæ фæзындтытæ раиртасгæйæ, æвæстиатæй ацæуын хъæуы дохтырмæ. Зæрдыл дарын хъæуы: низыхатт цас раздæр рабæрæг уа, уый бæрц æнтыстджындæр уыдзæн йе сдзæбæх кæнын.
Низы ныхмæ профилактикон мадзæлттыл дзургæйæ, фыццаджы-фыццагдæр, зæгъæн ис адæймаджы активон цардыуаджы тыххæй. Цас фылдæр змæлай, уый бæрц туджы зилдух уыдзæн хуыздæр. Цæст дарын хъæуы хи уæзмæ дæр. Æгæр хæрзхуыздзинад дæр ахъаз у варикозы фæзындæн. Ацы низы профилактикæйы ахадгæ бынат ахсы, адæймаг цы хæры, уыцы хойраджы экологон æмæ энергетикон æдасдзинад. Фылдæр хæрын хъæуы дыргътæ, халсартæ, клетчаткæйæ хъæздыг хойраг. Уы-
имæ, цæст дарын хъæуы, цæмæй адæймаджы буар донхъуаг ма æййафа.
Зæрдыл дарын хъæуы, алыхуызон хостæ нуазын æмæ зæнгтæ мазтæй сæрдын хъыгдард дадзины куыст не снывыл кæндзысты, æрмæстдæр ын рæстæгмæ сисдзысты йæ рыст. Низыхаттæй фервæзынæн нырыккондæр мадзал у тугдадзин лазерон тынтæй сдзæбæх кæныны фæрæз. Ацы методикæйæ архайгæйæ, дохтырты царм кæнæ тугдадзин лыг кæнын нæ бахъæуы, лазеры тынтæ буары мидæг сæхæдæг ссарынц хъыгдард дадзин æмæ йæм сæ тых саразынц…
Фæстаг рæстæг варикозæй рынчынты нымæц зынгæ фылдæр кæй кæны, уый специалистты сагъæсы æфтауы. Наукон-иртасæн кусæндæттæ агурынц тæссаг низимæ тохы ногдæр мадзæлттæ. Уыцы æууæлтæ хынцгæйæ, мах дæр æххæст кæнын райдайдзыстæм варикозы низыхатты ныхмæ рухстауæн-консультацион проект. Уыцы проекты бындурæвæрæн æмбырд уыдзæн 16 ноябры, Национ наукон библиотекæйы (Дзæуджыхъæу, Коцойы-фырты уынг, 43). Фембæлдмæ хонæм, варикозы тыххæй фылдæр хабæрттæ базонын æмæ йе ’нæниздзинад бахъахъхъæнын кæй фæнды, æппæт уыцы адæмы. Уыдонæй алкæмæн дæр фадат уыдзæн специалистмæ йæ фарстытæ раттыны фадат дæр.
Фембæлды райдайæн – 16 сахатыл.
Табуафси, саккаг нæм кæнут. Æмæ æнæниз ут!
Ныхас ныффыста
СЛАНТЫ Аслан
