Зындгонд куыд у, афтæмæй фидæн уалдзæджы бæрæг кæн-
дзыстæм Уæлахизы 80 азы. Уыцы бæрæгбоны агъоммæ зынгæ цалцæггæнæн куыстытæ хъуамæ æххæстгонд æрцæуой Дзæуджыхъæуы Намысы мемориалы.
Уый тыххæй фехъусын кодта Цæгат Ирыстоны сæйраг горæты администрацийы пресс-службæ.
Пресс-службæйы минæвары ныхасмæ гæсгæ, подрядон ор-
ганизацийы минæвæрттæ, фыццаджы-фыццагдæр, базилдзыс-
ты Сыгъдæг Георгийы скульптурæ æмæ йæ бындурмæ, мемориалы сæйраг бахизæнмæ, стæй цыртдзæвæн «Послы у императрицы»-мæ. Уыимæ, æппæты фылдæр æргом аздахын бахъæудзæн Сыгъдæг Георгийы скульптурæмæ, уымæн æмæ уый домы æвæстиатæй реставраци скæнын.
Зындгонд куыд у, афтæмæй æрæджы бетъырбухаг реставрацион æрмадз «Петрополь»-ы специалисттæ бæстон раиртæстой мемориалы цыртдзæвæнты уавæр æмæ радтой амынддзинæдтæ сæ банывыл кæныны фæдыл. Уыцы æрмæджыты бындурыл горæты администрацийы культурæйы управлени бацæттæ кодта мемориалы рацарæзтæн хъæугæ æппæт проектон-сметон документаци. Управленийы минæвары ныхасмæ гæсгæ, хæстæгдæр рæстæг расиддзысты, нысангонд цалцæггæнæн куыстытæ кæй бæрны бакæндзысты, уыцы подрядон организаци равзарыны фæдыл конкурс.
Уый – цыртдзæвæнты реставрациимæ баст фарста. Иннæмæй та мемориалы ныридæгæн цæуынц къахвæндæгты къæйдуртæ раивыны куыстытæ…
Нысангонд куыстыты сæйрагдæр хай хъуамæ ахицæн уа фидæн азы майы райдайæнмæ.
Калманты Аслан
