Национ культурæйы рæзтæн фидæны бюджеты «0» сомы кæй сæвæрдтой, уый уыйас никæй тыхсын кæны. О, депутат Дыдарты Сослан йæ фарстатæ Парламенты æмбырдмæ рахаста, фæлæ дзуапп цымæ райста?!
Кæмæдæр афтæ фæкæсдзæн, национ культурæйæн цавæр æхца хъæуы, зæгъгæ. Фæлæ нæ республикон газет «Рæстдзинад» дæр национ культурæйы хай у, уыимæ –йæ ахадгæдæр хай. Тынг хорз хъуыды кæнын, советон заман-иу æппæт бæрнон кусджыты размæ национ газет «Рæстдзинад» рафыссыны хæс куыд æвæрд цыд, уый. Ома, уæд дæр мызд ахæм стыр нæ уыд, æмæ сыл ма фæзына газет рафыссыны хъуыддаг, фæлæ амæлттæ кодтой, газет-иу дзæбæх рафыстой.
Адæймаг-иу уæддæр газет кастис, æнæ цæстдард нæ уыд, уымæй цард редакци дæр. Ныр та куыд у уыцы хъуыддаг?! Нæдæр – Хицауад, нæдæр – Парламент, нæдæр – иннæ чиновниктæ архайынц национ газеты рæзтыл, йæ кусджыты мыздыл, редакцион хæрдзтæ фæкъаддæр кæныныл. Афтæмæй хъуамæ газет куыд цæра, цæмæй, цавæр хæрдзтæй? Уæдæ нæ хъуыстгонд «Иры Стыр Ныхас» дæр йæхи равдыста, «Рæстдзинад»-ы тыххæй иу ныхас дæр ирон адæмы съезды нæ загъдæуыд. Уый уæм раст кæсы?
Кæд æмæ национ газет ахæм æдзæллаг уавæры ис, уæд уый абон нæ райдыдта, аххосæгтæ ивгъуыды агурын хъæуы. Фæлæ йæ йæхи бар ныууадз, æмæ куыд цæры, афтæ цæрæд, тыхамæлттæ кæнæд – уымæн гæнæн нæй…
Фæстæмæ советон заман нал раздахдзыстæм, фæлæ дзы уæд хорзæй, бæллиццагæй цы уыд, уыдонæй цæуылнæ ис спайда кæнæн? Мæнæ административон хъомыс кæй хонынц, уый цы фæцис, кæм бамбæхст? Ау, амæй ма фыддæр замантæ скæндзысты газетыл? Уæдæ пост дæр йæ архайд ныккуыддæртæ кодта, кæмдæр цыдæр сусæг митæ кæны, адæмæй адард ис, афтæмæй. Газетыл иузæрдион адæм тухитæ кæнынц, сæ фæдисы хъæр газеты редакцимæ барвитынц, фæлæ уыдон цы акæной…
Кæм нæ бахъуыдысты сæ товартæ, сæ кастрункæтæ, сæ къустæ? Ау, хæдзарадон дуканитæй бæз-бæз куы кæнæм, уæд постмæ цæудзыстæм æлхæнынмæ? Базарады аныгъуылдыстæм, нæ бон дзы схизын нал у. Афтæмæй кæдмæ цæрдзыстæм? Фæнды нæ риссаг фарстамæ паддзахадон ахаст фенын.
Æккæлаты Фаризæт, пенсиисæг
