РЦИ-Аланийы Сæргълæууæг Сергей МЕНЯЙЛОЙÆН фембæлд уыд, 2024 азы педагогон архайды стырдæр æнтыстдзинæдтæ чи равдыста, æмæ сæрмагонд премиты лауреаттæ чи систы, уыцы ахуыргæнджытимæ.
Зындгонд куыд у, афтæмæй Уæрæсейы Президенты уынаффæйæ æрвылаз дæр арæзт æрцæуы ахуыргæнджыты профессион дæсныдзинады конкурс (уыцы ерысы уагæвæрд сфидар кодта федералон Хицауад).
Сергей Меняйло йæ арфæйы ныхасы куыд фæбæрæг кодта, афтæмæй ахæм профессион ерыс-тæ ахъаз сты педагогты хъомыс уæрæхдæрæй раргом кæнынæн, ног ахуырадон-хъомыладон методикæты фæзындæн æмæ, æмткæй райсгæйæ, ахуырады къабазы дарддæры райрæзтæн.
– Зæрдиаг бузныг уын зæгъын уæ ахсджиаг æмæ бæрнон куысты тыххæй. Сымах фæлтæрдзинад æмæ дæсныдзинады фæрцы нæ кæстæртæ тырнынц зонындзинæдтæм, къæрцхъус сты царды ногдзинæдтæм. Ахуырады къабазы дарддæры ахадгæ райрæзты сæйрагдæр бындур сымах, педагогтæ, кæй стут, уый дызæрдыггаг нæу, – загъта Цæгат Ирыстоны Сæргълæууæг.
Ацы аз конкурсы уæлахиздзаутæ систы:
Людмилæ Арисланова (Дзæуджыхъæуы скъола-интернаты райдайæн кълæсты ахуыргæнæг);
Баликъоты Альбинæ (Михайловскы скъолайы физикæйы ахуыргæнæг);
Гæззаты Татьянæ (Æрхонкæйы 1-æм скъолайы мадæлон æвзаг æмæ литературæйы
ахуыргæнæг);
Тлатты Оксанæ (Æрыдоны 1-æм скъолайы райдайæн кълæсты ахуыргæнæг);
Хæблиаты Иринæ (Беслæны 8-æм скъолайы райдайæн кълæсты
ахуыргæнæг);
Цгъойты Дилярæ (Алагиры 3-æм скъолайы нывкæнынад æмæ технологийы ахуыргæнæг);
Цопанаты Зæлинæ (Республикон физикон-математикон лицей-интернаты уырыссаг æвзаг æмæ литературæйы
ахуыргæнæг).
Æппæт уæлахиздзаутæн дæр премийы хуызы саккаг кодтой фæйнæ 200 мин сомы.
СЛАНТЫ Аслан
