РЦИ-Аланийы министрадтæ æмæ ведомствæты радон æмбырд амыдта нæ республикæйы Хицауады Сæрдар Дзанайты Барис. Йæ архайджытæ æркастысты æмæ схъæлæс кодтой, республикæйы социалон-экономикон райрæзтæн ахъаз чи уыдзæн, ахæм ахсджиаг фарстатыл.
Фыццаг уыд кадрты фарста. РЦИ-Аланийы финансты министры хæдивæгæй 2027 азмæ снысан кодтой Мамсыраты Иринæйы.
Адæмы ’хсæн финансон зонындзинæдтæ æмæ финансон культурæ фæбæрзонддæр кæныны регионалон программæ нæ респуб-ликæйы сфидар кæныны хъæппæрисы тыххæй радзырдта РЦИ-Аланийы финансты министры хæстæ рæстæгмæ æххæстгæнæг Оксанæ Карова.
– 2030 азы онг ахæм ахуырадон центртæ хъуамæ æркусой Уæрæсейы æппæт регионты дæр. Йæ хъуыдымæ гæсгæ, алы кары адæймагмæ дæр хъуамæ уа ахæм зонындзинæдтæ, цæмæй алчидæр зона йæ бартæ, пайда кæна æппæт гæнæнтæй дæр. Æнæмæнгæй рапарахат уыдзæн ацы къабазы бархионты змæлд, бизнесимæ
æмгуыстад ахъаз уыдзæн фылдæр хъæугæ информаци райсынæн. Программæйы сæйраг нысан у, цæмæй адæм архайой сæ æфтиæгтæ æмæ сæ хæрдзтæн пълан кæныныл, – загъта Оксанæ Карова.
РЦИ-Аланийы цæрæн-уатон-коммуналон хæдзарад, артаг æмæ энергетикæйы министр Таматы Майрæны ныхасмæ гæсгæ, ивддзинæдтæ бахæсдзысты «Нырыккон горæты фалдзус»-ы паддзахадон программæ æмæ «Коммуналон инфраструктурæйы системæйы рацарæзт»-ы регионалон программæмæ.
– 2030 азмæ бындурон цалцæггонд æрцæудзыс-ты 260 бирæфатерон хæдзары, ног хуызы рацараздзысты 321 æхсæнадон фæзы. Хæрдзтæ цæудзысты куыд федералон, афтæ республикæйы бюджетæй дæр, – загъта министр.
Дарддæр куыст цæу-дзæн коммуналон лæггæдтæ, дон æмæ электрон тыхы системæтæ фæнывыл кæныныл.
РЦИ-Аланийы æрдзон фæрæзтæ æмæ экологийы министр Бæзаты Вадим æмбырды архайджыты базонгæ кодта 2030 азы онг РЦИ-Аланийы экологон æдасдзинад æмæ хъæды хæдзарады рæзты стратегиимæ.
Цæгат Ирыстоны ахуырадон куыстуæттæн ратдзысты 12 ног автобусы. Уый тыххæй Хицауады æмбырды фехъусын кодта нæ республикæйы паддзахадон исбонады министр Тедеты Руслан.
– Регионалонæй муниципалон исбонадæн ратдзыстæм сæрмагонд автобустæ «Газель Next» æмæ «ПАС» сывæллæтты ласынæн. Уыимæ, «Рæзты тæлм» кæй хонынц, ахæм кълæстæн – ахуырадон ифтонггарз, – фæнысан кодта министр.
Хицауады Сæрдары хъуыдымæ гæсгæ, ног автобустæ сты æдас æмæ хæссынц удæнцойдзинад скъоладзаутæн, уæлдайдæр дæрддзæф хъæуты цæрджытæн. «Фæстаг æртæ азы районты скъолатæ райстой 50 ног автобусы», – загъта Дзанайты Барис.
«Цæгат Ирыстоны 2030 азы онг социалон хъахъхъæнынады рæзты стратеги»-имæ Хицауады уæнгты базонгæ кодта РЦИ-Аланийы фæллой æмæ социалон рæзты министры хæстæ рæстæгмæ æххæстгæнæг Маматы Анджелæ.
– Райрæзты стратегийы нысантæ сты ноггуырдты нымæц фæфылдæр кæнын, мæгуыр дзинад фæкъаддæр кæнын, хистæр кары адæмæн алывæрсыг æххуыс кæнын, – загъта министрады разамонæг. Цæмæй хъуыддаг сырæза, уый тыххæй фæрæзтæ радих кæндзысты куыд бынæттон, афтæ федералон бюджетæй дæр.
Гугкаты Жаннæ
