Ирон паддзахадон академион театры знон уыд Цæголты Василийы историон романы бындурыл æвæрд спектакль «Послы гор»-ы премьерæ. Арæзт æрцыд, 250 азы размæ Ирыстон Уæрæсеимæ куы баиу, уыцы историон цауы кадæн.
Фæстаг азты Ирон театрæн уый у тæккæ егъаудæр спектакль. Архайынц дзы Ирон театры артисттæн сæ фылдæр, дзыллон сценæты та – Цæгат Ирыстоны паддзахадон университеты аивæдты факультеты студенттæ, Ирон театры скъола-студийы ахуыргæнинæгтæ æмæ культурæйы колледжы ахуырдзаутæ.
Спектаклыл бакусынмæ æрбахуыдтой мæскуыйаг театр «Эрмитаж»-ы режиссер Михаил Левитины æмæ уыцы театры сæйраг нывгæнæг Гарри Гумелы. Михаил Левитин уыд инсценировкæ саразæг, Гарри Гумель та – нывгæнæг-сценограф. Спектаклы режиссер у Ирон театры аивадон разамонæг Уалыты Гиви, композитор – Ольгæ Шайдуллина, хореограф – УФ-йы театралон премийы лауреат Сихъоты Тимур.
Спектаклы æвдыст цæуы нæ адæмы æцæг истори. 18-æм æнус… Туркæгтæ, персайнæгтæ, æцæгæлон æндæр бæстæтæй лæбурджытæ æмæ тыхæйисджытæ ирон адæмы алырдæм ратон-батон кодтой. Æмæ се скаст, сæ иунæг ныфс, сæ ирвæзынгæнæг ссис Уæрæсе. Уæд ирон адæмы минæвæрттæ, сæ сæргъы – ирон адæмæн сæ раззагдæртæй æмæ куырыхондæртæй иу – Магкаты Зураб, афтæмæй фыццаг хатт араст сты Бетъырбухмæ Уæрæсейы паддзах Елизаветæмæ сæ курдиатимæ, цæмæй ирон адæмы йæ дæлбар райса, хæхтæй быдырмæ æрлидзыны бар сын ратта, Ирыстон та Уæрæсейы скондмæ бацæуа.
Ирд сценикон фæлгонцтæ, раздæр чи никуыма уыд, ахæм декорацитæ, диссаджы музыкæ – театрдзауты аскъæфынц ивгъуыд дугтæм, хуымæтæг чи нæ уыд, уырыссаг æмæ кавказаг культурæтæ сæ кæрæдзи «æмбарын» куы райдыдтой, ахæм рæстæджытæм.
Спектаклы райдайæны размæ сценæмæ рацыд æмæ театрдзаутæн арфæ ракодта Ирон театры директор Дудайты Чермен, стæй ныхасы бар ратта республикæйы культурæйы министр Фидараты Сосланæн. Залы бадæг адæмæн арфæ кæнгæйæ, Фидары-фырт фехъусын кодта республикæйы Сæргълæууæг Сергей Меняйлойы указ: ирон театры аивадон разамонæг Уалыты Гивийæн, театралон аивадмæ стыр бавæрæн кæй хæссы æмæ йæ размæ ракæныныл зæрдиагæй æмæ æнтыстджынæй кæй архайы, уый тыххæй лæвæрд æрцыд Республикæ Цæгат Ирыстон-Аланийы адæмон артисты кадджын ном.
Спектаклы кæрон артисттимæ иумæ сценæмæ рахызт Уалыты Гиви дæр. Театры аивадон разамонæг стыр арфæ ракодта, спектаклыл чидæриддæр бакуыста, уыдонæн се ‘ппæтæн дæр. Уæлдæй арфæйы ныхæстæ загъта премьерæмæ æрбацæуæг Магкаты мыггаджы минæвæрттæн, стæй, спектакль саразынмæ йе ‘ххуысы хай чи бахаста, уыдонæн – республикæйы Сæргълæууæг æмæ Хицауадæн æмæ æхсæнадон архайæг, республикæйы раздæры Сæргълæууæг Битарты Вячеславæн.
ДЕДЕГКАТЫ Зæлинæ
