Дзæуджыхъæуы Сывæллæтты сфæлдыстады галуаны цалцæ-
джы æппæт куыстытæ дæр ахицæн уыдзысты ацы мæйы кæронмæ. Уый тыххæй фехъусын кодта объектыл кусæг подрядон организаци – компани «СКИФОС-РСК»-йы разамонæг Петр ПАВЛОВ.
Компанийы минæвары ныхасмæ гæсгæ, галуаны бакодтой бирæ куыстытæ: бæстыхайы сæр æмæ æппæт коммуникацитæ раивтой, сæвæрдтой дзы ног рудз-
гуытæ æмæ дуæрттæ, баиу кодтой зынгсирвæзтæй хъахъхъæнæг сигнализаци æмæ вентиляцион системæтæ, сæйраг бахизæн æмæ уæладзгуыты хатæнтæ æрæмбæрзтой керамогранитæй, кафджыты сфæлдыстадон коллективтæ кæм архайдзысты, уыцы бæстыхæйтты пъолтыл та айтыдтой сæрмагонд «кафæн»
линолеум…
Спортивон æмæ стыр концертон залы ныр фæзындысты кондиционертæ дæр. Петр куыд бафиппайдта, афтæмæй стыр концертон залы цалцæг рацарæзты дыккаг къæпхæны куыстыты пъланмæ хаст нæ уыд, фæлæ заказгæнæджы курдиатмæ гæсгæ подрядчик уыцы зал дæр рацарæзта (уыимæ, уыцы куыст бакодта йæхи фæрæзтæй, цалдæр милуан сомы схардз кæнгæйæ).
Зындгонд куыд у, афтæмæй Сывæллæтты сфæлдыстады галуаны рацарæзт æххæстгонд цæуы къæпхæнгай. Ацы азмæ нысангонд уыд цалцæггæнæн куыстыты дыккаг къæпхæн. Æмæ райдыдтой афойнадыл. Рагагъоммæ пъланы куыд нысангонд уыд, афтæмæй федералон бюджетæй объектæн хъуамæ радих кодтаиккой 100 милуан сомы. Фæлæ алы аххосæгтæм гæсгæ уыцы фæрæзтæ афойнадыл нæ фæхæццæ сты
республикæмæ. Цæмæй нысангонд куыстытæ æхцайы кадаварæй ма фæкъуыхцы уой, уый тыххæй регионы разамынды уынаффæйæ объектæн республикæйы хардзæй радих кодтой 47 милуан сомы. Уый фæрцы галуаны цалцæджы мидæггаг куыстытæ ахицæн уыдзысты, куыд нысангонд уыд, афтæ 2024 азы.
Уыимæ, специалисттæ куыд зæгъынц, афтæмæй хъæугæ фæрæзтæ куы фæзына, уæд æххæстгонд æрцæудзæн галуаны бындурон рацарæзты æртыккаг къæпхæн дæр. Уый фæлгæты бакæндзысты галуаны æддаг фæлгонцадон куыстытæ æмæ бæс-
тыхайы бындуры гидроизоляци. Уæвгæ, уыдон – фидæны нысантæ. Ныртæкæ та уал фадæттæ арæзт цæуы, цæмæй хæстæгдæр рæстæг хъомыладон-сфæлдыстадон центр ногæй йæ архайд рапарахат кæна.
КАЛМАНТЫ Аслан
