Ивгъуыд азы кæрон чиныгуадзæн «Харизма»-йы мыхуыры рацыд «Ирон драматургийы антологи»-йы фыццаг том. Хорз цау уыд уый нæ республикæйы нырыккон культурæйы рæзты. Рауагътой йæ Уæрæсейы Федерацийы Президенты фонд «Культурæйы хъæппæрис»-ы гранты фæрæзтæй. Антологийы фыццаг том æмæ иумæйагæй йæ дарддæры рауагъдтæ мыхуырмæ бацæттæ кодтой нæ республикæйы Театралон архайджыты цæдисы сæрдары хæдивæг, актрисæ Пагæты Фатимæ æмæ режиссер Хъæрджынты Иринæ.
Антологимæ цы æрмæджытæ бацыдысты æмæ фидæны хаст æрцæудзæн, уыдон сты Октябры революцийы размæ, советон дуджы алы азты, стæй уый фæстæ азты нæ ирон драматургты алы фæлтæрты фыст ирон æмæ уырыссаг пьесæтæ. Сæ фылдæр æвæрд æрцыдысты Хуссар æмæ Цæгат Ирыстоны профессионалон театрты. Бирæтæ дзы амæй размæ мыхуыргонд уыдысты хицæн хæйттæй журналтæ æмæ иумæйаг æмбырдгæндты. Ныр сæ антологимæ йæ аразджытæ бахастой æнæхъæнæй. Фыццаг æмæ уый фæстæ томтæн æрмæг агурынц Национ наукон библиотекæйы,
Хетæгкаты Къостайы номыл Ирон литературæйы æмæ Театралон музейы æвæрæнты, Цæгат Ирыстоны Абайты Васойы номыл Социалон æмæ гуманитарон иртасæнты институты архивы, фысджытæ æмæ артистты хи архивты.
Ирон драматургийы антологи аразджытæй иу, Пагæты Фатимæ нын куыд радзырдта, афтæмæй йæ рауагъдтæ (томтæ) хъуама уой дæс чиныгæй фылдæр. Пайда дзы кæндзысты æхсызгонæй, куыд профессионалон, афтæ хихъæппæрисадон театрты режиссертæ æмæ артисттæ, архайджытæ. Алы томы тираж дæр у иу мин экземпляры. Хорз ахъаз уыдзæн ирон æвзаг æмæ литературæйы ахуыргæнджытæн, фæсахуырты скъоладзаутимæ хъомыладон куыст кæнгæйæ.
Фыццаг томмæ разныхас ныффыстой филологон наукæты кандидат Сæлбиты Тамир æмæ нæ республикæйы адæмон артист Дауыраты Эдуард. Антологийы фыццаг чиныджы сты Хетæгкаты Къоста, Гуырдзыбеты Блашка, Брытъиаты Елбыздыхъо, Хъороты Дауыт, Кочысаты Розæ æмæ Токаты Алиханы пьесæтæ.
Æрæджы та нæ бæстæйы политикон парти «Иугонд Уæрæсе»-йы рес-
публикон хайады æхсæнадон æххуысгæнджыты штабы уыд «Ирон драматургийы антологийы» дыккаг æмæ æртыккаг томты презентаци. Архайдтой дзы нæ республикæйы Фысджыты цæдисы сæрдар, литературæиртасæг Хозиты Барис, ЦИПУ-йы Журналистикæйы факультеты декан Хæбæлаты Фатимæ, Театралон архайджыты цæдисы сæрдары хæдивæг, антологи аразджытæй иу Пагæты Фатимæ, Тæбæхсæу-
ты Балойы номыл Ирон академион театр æмæ нæ республикæйы иннæ
театрты коллективтæ æмæ разамонджытæ, ахуыргæндтæ, библиотекæтæ æмæ культурæйы артдзæстыты кусджытæ, чиныгкæсджытæ.
Ирон драматургийы антологийы дыккаг æмæ æртыккаг чынгуытæм хаст æрцыдысты Къубалты Алыксандр, Коцойты Арсен, Гæдиаты Цомахъ, Малиты Георги, Хъуысаты Дмитри, Беджызаты Чермен, Туаты Дауыт, Цопанаты Хаджумар, Токаты Асæх, Джимиты Георги, Мамсыраты Дæбе, Епхиты Тæтæри, Фæрнион Къос-
тайы драмон уацмыстæ. Дыккаг томмæ разныхас ныффыста æмæ ирон
драмон рæзты уавæрыл иумæйагæй йæ зонадон уацы раргом кодта филологон наукæты кандидат Хъуыссæты Зæлинæ. Уый арæхстджын æмæ ирон драматургийы æрмæг бæстон æмæ бæлвырд ахуыр кæны æмæ иртасы бирæ азты. Ис æм хорз монографи Хетæгкаты Къостайы сфæлдыстадæй, сæрмагондæй та æрдзырдта йæ пьесæ «Дуня»-йы тыххæй.
Антолгийы æртæ томы цы хъæздыг æрмæг федта рухс хицæн чиныгæй, уый тыххæй презентацийы сæ хъуыдытæ загъта Хозиты Барис. Уый бахаста фæндон, цæмæй антологийы хицæн томмæ хаст æрцæуой ирон профессионалон театралон аивад æмæ нæ драматургты сфæлдыстады тыххæй алы азты нæ зындгонд ахуыргæндты тыххæй уацтæ æмæ очерктæ.
Презентацийы ма ирон театралон аивад æмæ сфæлдыстады рæзты тыххæй сæ хъуыдытæ загътой Сæлбиты Тамир, кинорежиссер Туаты Теминæ, поэт, тæлмацгæнæг Баситы Зæлинæ, рауагъдад «Харизма»-йы сæргълæу-
уæг, нæ республикæйы культурæйы сгуыхт кусæг Аидæ Харкиладзе.
Ирон драматургийы антологийы дыккаг æмæ æрыккаг чингуыты редактор æмæ корректор у нæ республикæйы культурæйы сгуыхт кусæг, газет «Рæстдзинад»-ы бæрнон нымæрдар Гапбаты Алетæ.
Ацы антолгийы иннæ чингуытыл куыст цæуы дарддæр. Лæвар сæ байуардзысты нæ республикæйы скъолатæ æмæ культурæйы хæдзæртты библиотекæтыл.
ГАСАНТЫ Валери,
Хетæгкаты Къостайы
номыл Ирон
литературæйы
музейы хистæр
зонадон кусæг