Цæгат Кавказы хæххон-металлургон институты РЦИ-Аланийы ахуырад æмæ наукæйы министр Алыбегты Эллæ фембæлд республикæйы дзыллон хабархæссæг фæрæзты минæвæрттимæ, скъолаты ахуырдзаутæ, ахуыргæнджытæ æмæ студенттимæ. Фембæлды нысан уыд 2024 азы бæрæггæнæнтæ бахынцын æмæ ног нысантæ, ног программæтæ сбæрæг кæнын.
Фембæлд байгом арфæйы ныхæстæй. Цæгат Кавказы хæххон-металлургон институты ректор Хъамболты Дзамболат æрæджы сбæрæг кодта йæ райгуырды 65 азы юбилей. Уый фæдыл ын зæрдиаг арфæ ракодта Алыбегты Эллæ. Æмæ ма ноджы йæ райгуырды 75 азы юбилейы фæдыл арфæтæ райста Дзæуджыхъæуы гимназ «Диалог»-ы уырыссаг æвзаг æмæ литературæйы ахуыргæнæг Хъесаты Еленæ.
Дарддæр министр бæстон дзуаппытæ ратта журналисттæ æмæ студентты фарстытæн. Йæ ныхасмæ гæсгæ, республикæйы бюджеты æртыккæгæм хай хаст æрцыд ахуырады къабазмæ. Уыдоны фæрцы Ирыстоны скъолатæ архайдзысты алыхуызон гранттæ æмæ олимпиадæты, бафтдзæн ахуыргæнджыты мыздыл дæр. 28 скъолайы ацы аз æрцæудзысты бындурон цалцæг. 56,5 мин ахуырдзауы алы бон дæр райсынц хъарм хæринаг.
Куыд иунæг адæмон газет ирон æвзагыл, афтæ фылдæр æргом аз-
дахдзыстæм, мадæлон æвзаджы хъысмæтыл цы фарстытæ лæвæрд æрцыдысты, уыдонмæ.
– Ахуыргæнæн предметты ’хсæн ирон æвзагæн ис йæхи сæрмагонд бынат. Æз афтæ хъуыды кæнын, æмæ ирон ныййарджыты цот хъуамæ ахуыр кæной сæ мадæлон æвзаг ирон къорды. Фидæны нæ зæрды ис, ирон æвзаг бæлвырддæр кæм ахуыр кæндзысты, ахæм кълæстæ байгом кæнын. Ирон æвзагæй олимпиадæты чи фæуæлахиз уа, уыдонæн, уæлдæр ахуыргæнæндæттæм цæугæйæ, бафтаудзыстæм 5 баллы, – загъта министр, æмæ ма йæ ныхасыл бафтыдта:
– Мадæлон æвзагыл цы ахуыргæнæн чингуытæ рауагътам, уыдон бирæты зæрдæмæ нæ цæуынц, сты зын æмбарæн сывæллæттæн, бирæ домæнтæн дзуапп нæ дæттынц. Уыцы хъуыддагыл хъæуы лæмбынæгдæр бакусын, æмæ йыл архайæм. Цы ног чиныг бацæттæ кодтам, уый тагъд арвитдзыстæм федералон экспертизæмæ.
Стыр æргом министр аздæхта, национ проектæ куыд æххæстгонд æрцыдысты, уымæ. Уыдонмæ хауынц ахæм программæтæ: «Хъæууон ахуыргæнæг», «Æрыгон профессионалтæ», «Слестгæнæн комитеты кълæстæ» æмæ иннæтæ.
Кæронбæттæны ахуырад æмæ наукæйы министр арфæ ракодта дзыллон хабархæссæг фæрæзты минæвæрттæн æмæ загъта:
– Мах иумæ аразæм ахæм фидæн, зонындзинæдтæ æмæ æппæт уавæртæ дæр алкæмæн æмхуызонæй куыд уой.
ХЪОЙБАЙТЫ Галинæ, къамтæ систа
Татьянæ Шеходанова