Йæ зарæджы сæр – уарзт æмæ Ирыстон

0
33

Уарзæгой зæрдæ…  Хи цæстæнгас цардмæ… Ирыстонмæ сыгъдæг уарзт… Ацы æмæ æндæр фæзминагдæр æмæ иууыл тæхудиагдæр арфæйаг рæсугъд миниуджытæй хай-джын уыд  зындгонд курдиатджын поэт, журналист, газет «Рæстдзинад»-ы раздæры сæйраг редакторы хæдивæг, Уæрæсейы Федерацийы Фысджыты цæдисы уæнг, Республикæ Цæгат Ирыстон-Аланийы сгуыхт кусæг Цомайты Ростиславы æнкъараг æмæ  рæсугъд уд.  Зыдта  лæджы зæрдæ бахъæлдзæг кæнын, цардмæ разæнгарддзинады ныфс дзы бауадзын, цыргъзонд æмæ фæлмæн ныхасæй йæ алыварс адæмы хурау батавын.

Курдиатджын поэт, журналист æмæ нывгæнæг Цомайты Михалы фырт Ростислав
райгуырд 1960 азы Алагиры. Астæуккаг скъола æнтыстджынæй каст фæуыны фæстæ фидæны национ мыхуыр æмæ ирон аив дзырды зæрдиаг зиууон
ахуыр кæнынмæ бацыд Цæгат Ирыстоны Педагогон  училищæйы сыгъзæринимæ куысты хайадмæ. Ныв кæнын æмæ æрдзы фидыцтæ  армы арæхст-дзинад æмæ уды  стыр фарны хорзæхты руаджы æвдисыны курдиат Ростиславæн  Хуыцауæй лæвæрд кæй сты, уый  йе ‘рыгонæй дæр бæрæг уыд.  Раст хи фыдау ыл аудыдта, училищæйы ахуыргæнгæйæ,  зындгонд нывгæнæг æмæ скульптор  Дзбойты Михал.

Училищæ фæуыны фæстæ Ростиславы бафæндыд уæлдæр ахуырад райсын. Бацыд Цæгат Ирыстоны Хетæгкаты Къостайы номыл паддзахадон университеты ирон  филологийы факультетмæ. Ам та уæлдай ирдæй рабæрæг йæ поэтикон курдиат. Ахуыр æмæ сфæлдыстадон куыстмæ тырнындзинад Ростиславы кодтой иу æнтыстæй иннæмæ. Зæрдæхæлар, зондмæ тырнæг æмæ хистæртæн аргъгæнæг, цыргъзонд æмæ æмгарджынæй  йæ зыдтой йæ бирæ хиуæттæ æмæ æмкусджытæ, йæ хæлæрттæ.

Университет каст куы фæци Ростислав, уæд  æй йæ царды фæндаг æркодта Цæгат
Ирыстоны  национ адæмон газет «Рæстдзинад»-ы редакцимæ. Фæкуыста дзы зæрдиаг æмæ бæстонæй ссæдз азæй фылдæр. Уыд дзы уацхæссæг,  фæсивæд æмæ спорты хайады сæргълæу-уæг, бæрнон редактор, сæйраг редакторы хæдивæг. Ацы бæрнон бынæтты йæ куыст уыд тæхудиаг æмæ фæзминаг, бæстон. Ирыстоны  быдираг æмæ хæххон хъæутæм, районтæм   зымæг уа, сæрд уа, хур кæса, уаргæ кæна – зивæг цы у, уый нæ зыдта. Иудадзыгдæр  профессион сфæлдыстадон уагæй куыста йæхиуыл. Йæ фыст информацион уацхъуыд, интервью, очерк, репортаж  уыдысты хъуыды æмæ мидисæй хъæздыг, мыхуыры æрыгон кусджытæн ахуырæн бæзгæ æрмæг.

Курдиатджын поэт, журналист, мыхуыр æмæ аив дзырды зиууон Цомайты Ростиславæн йæ царды иууыл зынгæдæр бынат, сфæлдыстадон æмæ журналисты  профессион дæсны-йады фæстæ ахста спорт. Йæ  зонд, йæ дæсныйады æппæт хъарутæй дæр  зæрдиаг æмæ бæстонæй архайдта, цæмæй газет «Рæстдзинад»-ы спорты алы
хуызтæ æмæ дзы æнтыстджынæй чи архайы, уыцы тренертæ æмæ фæсивæды, ветеранты  тыххæй æрмæг, нæ фыдæлты  спортивон культурæ æвдыст цæуой парахатæй.  Йæ хъæппæрисæй  арæзт æрцыд газет «Рæстдзинад»-ы спорт æмæ фæсивæды хайад. Иудадзыг  мыхуыры цæуын райдыдтой тематикон фæрстæ «Зилахар», «Нæ Иры фæсивæд»,  æрхъуыды кодта цалдæр рубрикæйы. Иттæг арæхст журналистикæйы алы жанры дæр сфæлдыстадон куыст кæнынмæ. Зонд æмæ æрхъуыдыйæ – хъæздыг, зæрдæйы сфæлдыстадон хорзæхтæй – хайджын. Йæ зонды хорзæхтæ æмæ профессион бирæвæрсыг арæхст-дзинадæй аудыдта æрыгон уацхæсджытыл. Цæстуарзонæй сын амыдта  сфæлдыстадон куысты сусæгдзинæдтæ.  Арфæйаг фæстиуæгджынæй кусын зыдта газет «Рæстдзинад»-ы   æхсæнадон уацхæсджыты алы кары æмæ дæсныйæдтыл хæст адæмимæ.

Уæдæ,  «Рæстдзинад»-ы редакци, газеты фыццаг номыры рацыдыл 80 азы сæххæсты бонмæ  йæ историйыл дзурæг чиныг «Цардайдæн» рауадзыныл куы куыста йæ раздæры сæйраг редактор, ирон культурæ æмæ мыхуыры зæрдиаг архайæг Хъесаты Валодяйы разамындæй, уæд  Ростислав  та дзы йæ курдиат, канд куыд фæлтæрдджын журналист нæ равдыста, фæлæ ма чиныгæн уыд йæ аивадон редактор æмæ нывгæнæг.

Йæ зæрдæ  æмæ зонды хорзæхтæй  Ростислав сахадыдта канд газет «Рæстдзинад»-ы цæрайы æмæ уды тыхы фидардзинадыл нæ, фæлæ ма йæ профессион зонындзинæдтæ хорзæй фæбæрæг сты  газеттæ «Аланты ныхас»,  «Спорт Иристона»-йы рацыдыл æмæ иумæйагæй национ мыхуыры азфысты хи сæрмагонд бынат ссарыны хъуыддагыл.

Номдзыд богал æмæ тренер, газет «Рæстдзинад»-ы æхсæнадон уацхæссæг, Ирыстоны кадджын хистæр Дзгойты Аслæнбеджы ном, царды, хæстон фæндæгтæ, спортивон æнтыс-тытæ  хицæн чиныджы хуызы равдисын дæр Ростислав æмæ иннæ курдиатджын спортивон журналист Дзатцеты Карены зæрды кæй æрæфтыд, уымæй Ирыстон æмæ нæ бæстæйы мингай спортуарзджытæн ракодтой стыр æмæ зынаргъ лæвар. Чиныг «Батя»  рауад мидисæй хъæздыг, бакастæй – аив. Абон æй ссарæн дæр нал ис.

Курдиатджын журналист,  поэт, газет «Рæстдзинад»-ы  фидар цæджындз  Цомайты Ростислав бæстон æмæ удуæлдайæ бацархайдта йæ зындгонд æрвад,
рухстауæг, дины æмæ æхсæнадон кусæг, тæлмацгæнæг  Цомайты Харлампийы ном, цард, рухстауæн архайд, бирæ хорз хабæрттæ  абоны фæлтæртæн базонын кæныныл, йе сфæлдыс-тадон бынтæ йын газет «Рæст-дзинад» æмæ æндæр мыхуыры фæрæзты руаджы иу æмæ дыууæ хатты нæ рахаста адæммæ.

Зæрдæхæлар, бæрнон, цæст-уарзон,  аудаг уды хицау уыд, не ‘ппæт дæр, буцæй  Ростик кæй хуыдтам æмæ  нын йæ зонд æмæ адæймагдзинады иууыл
хуыздæр миниуджытæй рæда-уæй хай чи кодта, уыцы курдиатджын поэт, журналист, Æмбалты Цоцкойы номыл премийы лауреат Цомайты Ростислав. Стыр æмæ сыгъдæг уарзт Ирыстонмæ, йæ адæммæ, ирон дзырд-мæ, ныййарæгмæ, кæстæртæм, хиуæттæ æмæ хæлæрттæм, зонгæтæм уыдысты йæ царды Хуыцæуттæ æмæ хицæуттæ. Йæ цыбыр, фæлæ арфæйаг царды, табу кодта зонд, курдиат, уды тых æмæ адæймагдзинадæн. Ацы  хорзæхтæ уыдысты йæ поэтикон курдиаты миниуæгон бындуртæ.  Йæ фыццаг æмдзæвгæты чиныг «Сусæг мæт» мыхуыры куы рацыд, уæд, ирон дзырдæн æцæгæй аргъ чи кæны æмæ йæ уд æмæ зондæй чи ‘нкъары, уыцы чиныгкæсджытæн уыд бæрæгбонау æхсызгон, стыр цины хос.

Фæстæдæр ын цы ног уацмысты чингуытæ рацыд  «Донгуырæн», «Дети солнца», уыдон дæр мидис æмæ æмдзæвгæты темæты алывæрсыг æнкъарæнджын æмæ хæдхуыз, фæлгонцджын хъуыдытæй агайдтой æмæ агайынц адæмы зæрдæтæ.

Йæ  адзалы фæстæ Цомайты Ростиславæн йæ  æмдзæвгæты, очеркты, интервьюты,
радзырдтæ æмæ тæлмацты, нырмæ мыхуыры чи нæ уыд, йæ архивы æфснайдæй чи лæууыд, уыцы уацмыстæ æмæ  йæ цард æмæ  сфæлдыстады тыххæй  литературон-критикон æрмæджыты иумæйаг  æмбырдгонд  «Удварны хорзæх»  мыхуыры рацыд 2019 азы  чиныгуадзæн «Ир»-ы. Йæ рауадзыныл тынг зæрдиагæй бацархайдтой Ростиславы  хорз хæлæрттæ, зындгонд журналист, литературæиртасæг Тъехты  Тамерлан æмæ  газет «Рæстдзинад»-ы раздæры уацхæссæг  Агънаты Алан.

Цыппæрæмы та  Национ наукон библиотекæйы уыд Цомайты Ростиславы номарæн юбилейон изæр. Арæзт æрцыд нæ республикæйы Фысджыты цæдис æмæ Национ библиотекæйы бæстæзонæн хайады хъæппæрисæй. Зæлыдысты дзы  Ростиславы æмдзæвгæтæ æмæ йæ ныхæстыл фыст  зарджытæ.  Сæ цæдисон хæлар, уарзон æмкусæг, курдиатджын журналист, поэт  æмæ хорз ирон лæг Цомайты Ростиславы  цард æмæ бирæвæрсыг сфæлдыстадон архайды тыххæй дзы зæрдиаг ныхæстæ загътой Фысджыты цæдисы сæрдар, литературæиртасæг Хозиты Барис, газет «Рæстдзинад»-ы уацхæссæг Баскаты Уырызмæг,  поэт, журналист Къадзаты Станислав, филологон наукæты кандидат Тахъазты Фидар, журналтæ «Мах дуг» æмæ «Ирæф»-ы сæйраг редактортæ Хетæгкаты Оксанæ æмæ Скъодтаты Эльбрус. Мыггаджы номæй арфæ ракодта Цомайты Хъазыбег.

Сæрмагондæй номарæн изæрмæ библиотекæйы кусджытæ бацæттæ кодтой Цомайты Ростиславы  цард æмæ сфæлдыстадыл дзурæг æрмæджыты мидисджын равдыст.

Фарс бацæттæ кодта Гасанты Валери,
    къамтæ систа Татьянæ Шеходанова

ОСТАВЬТЕ ОТВЕТ

Please enter your comment!
Please enter your name here