Абон Дзæуджыхъæуы 14 сахатыл байгом уыдзæн Мæскуыйаг Куадзæны фестиваль. Номдзыд дирижер Гергиты Валери концертон фæз «Патэ»-йы (раздæры кинотеатр «Комсомолец») ратдзæн бæрæгбоны стыр концерт.
Уымæй уæлдай, Мариинаг æмæ Стыр театрты Страдивари-ансамблы иугонд оркестримæ Цæгат Ирыстоны Мариинаг театры хайæдты фæзтыл маэстро ратдзæн концерттæ. Концертон залы уый уыдзæн 19 сахатыл, оперон театры та – 21 сахат æмæ 30 минутыл равдисдзысты оперæ «Сельская честь».
Мæскуыйаг Куадзæны фестиваль Уæрæсейы культурон царды ахсджиаг бынат ахсы. Йæ аразджытæ ацы аз уæлдай æргом аздæхтой Уæлахизы 80 азы æмæ Петр Чайковскийы райгуырды 185 азы бæрæгбæттæм. Æмхуызонæй бузныг стæм Гергиты Валерийæ, Цæгат Ирыстоны культурæйы рæзтмæ ахæм стыр бавæрæн кæй хæссы, уый тыххæй. Кæд æмæ йæ график тынг вазыгджын у, уæддæр рæстæг ссары æмæ æрцæуы йæ райгуырæн къонамæ.
Нæ уацхæссæг
