Уыцы лæппутæ æмæ се спортивон сгуыхтдзинæдтæ дæргъвæтин азты баззайдзысты Ирыстоны футболы историйы. Дзæуджыхъæуы «Спартак»-ы хъазджыты тыххæй зæгъæм. Командæ райгуырд ивгъуыд æнусы 60-æм азты фыццаг æмбисы.
Цыбыр рæстæгмæ курдиатджын ирон тренертæ Зозырты Андрей æмæ Цæлыккаты Муссæйы разамындæй «Спартак» адæмы йæхимæ æркæсын кодта, нæ республикæйы мингай футбол-уарзджыты зæрдæты стыр ныфс бауагъта, 1969 азы
ноябры та æнæхъæн Советон Цæдисы адæм дисы бафтыдта – дыккаг къорды тæккæ тыхджындæр командæты ’хсæн тохы фæуæлахиз æмæ рацыд советон футболы уæлдæр къордмæ. Уыцы цауы тыххæй бирæ фыст æрцыд, рауагътой чингуытæ дæр.
Ахæм лæгдзинад æмæ арæхстдзинад чи равдыс-та, уыцы лæппутимæ уыдис размæбырсæг Георгий Кайшаури дæр. Цалдæр боны размæ нæ республикæйы спортивон æхсæнад сбæрæг кодтой Георгийы 80 азы юбилей. Уыцы цауы фæдыл кадджын æмбырдмæ парти «Иугонд Уæрæсе»-йы Цæгат Ирыстоны хайады исæн уатмæ æрбацыд дзæвгар адæм – футболуарзджытæ, тренертæ, уыцы азты «Спартак»-ы хъазджытæй ма фадат кæмæн уыдис Георгийæн раарфæ кæнын, уыдон, журналисттæ. Хъыгагæн, уыцы намысджын командæйы уæнгтæ се ’ппæт немæ нал сты, рухсаг уæнт.
Юбиляры кадæн изæр бацæттæ кодта гуырдзиаг æхсæнадон организаци «Эртоба», æмæ рауад тынг рæсугъд æмæ мидисджын.
Байгом æй кодта «Эртоба»-йы сæрдары хæдивæг, Цæгат Ирыстоны медицинон академийы кафедрæйы сæргълæууæг, Уæрæсейы Федерацийы сгуыхт дохтыр, профессор Николай Бурдули. Уый фæстæ Георгий Кайшаурийæн йæ юбилейы фæдыл зæрдиаг арфæтæ ракодтой газет «Рæстдзинад»-ы сæйраг редактор Фидараты Юрий, Баскаты Уырызмæг, ацы рæнхъыты автор, «Эртоба»-йы раздæры сæрдар Роберт Цинделиани, Георгий бирæ азты дæргъы йæ уарзон спорты хуызы кæимæ архайдта, уыцы футболисттæ – Зозырты Игорь, Гиви Керашвили, Гæззаты Юри, мадзалмæ æрбацæуæг футболуарзджытæ.
Фембæлд саразджытæ равдыстой Тебиаты Златæйы ист цымыдисаг æмæ мидисджын киноныв Георгий Кайшаурийы спортивон сгуыхтдзинæдты тыххæй.
Кæронбæттæны юбиляр зæрдиаг арфæ ракодта фембæлдмæ æрбацæуæг адæмæн æмæ загъта, цы ‘нтыстытæ æмæ уæлахизтæ бафтыд йæ къухы Дзæуджыхъæуы «Спартак»-ы хъазæг курдиатджын фæсивæдимæ, ахæм уæлахизтæй та нæ командæ Ирыстоны футболуарзджыты зæрдæ куыд рухс кæна дарддæр дæр.
Мах не ‘ппæт дæр уымæ бæллæм, бæргæ. Цалх, дам, дæндаггай зилы…
Хæмыцаты Морис,
къам систа
Тебиаты Златæ
