Æрхæццæ Стыр Уæлахизы 80 азы бæрæгбон, æмæ та йыл мах, хæсты сывæллæттæ, сæмбæлдыстæм цин æмæ хъыджы цæссыгтимæ. Уымæн æмæ хæст у мæлæт, æмæ, йæ ныхмæ тох кæнгæйæ, нæ хæстонтæ, фыдæлты уæзæг афтæ бирæ чи уарзта æмæ райгуырæн зæххæй ард чи хордта, уыдонæн сæ фылдæр сæ къонатæм нал æрыздæхтысты.
Уæлахизы цины хабар нал базыдтой. Нал федтой сæ бинонты, гыццылтæй кæй ныууагътой, кæнæ, сæ райгуырд дæр кæмæн нал федтой, сæ уыцы кæстæрты. Хæст куы фæци, уæдæй абонмæ нæ бæстæйы хицауад иу иннæйы ивгæ цыд, фæлæ хæсты сывæллæтты кой иунæг дæр нæ бакодта. Кæцы аз, уый нал хъуыды кæнын, фæлæ Уæрæсейы Президенты бынатмæ æвзæрстытæ куы уыд, уæд æрмæстдæр иу хатт Зюгановæй фехъуыстон сæ кой. Уый загъта: «Мы за то, чтобы дети войны получили такие же льготы, какие получают участники войны».
Бæргæ, нæ паддзахады ’рдыгæй кæнæ нæ хицауадæй исты æххуыстæ куы зониккам мах, хæсты сывæллæттæ.
Æргомæй йæ зæгъын, бирæ нал стæм, сæ фыдæлтæ кæмæн фæмард сты Фыдыбæстæйы Стыр хæсты, уыдон. Æмæ та Уæлахизы радон 80 азы бон уыдоны сагъæс ничи фехъуыста, ацы хатт дæр рохуаты баззадысты.
Цасфæнды рæстæг куы рацæуа, иу дуг иннæйы ивгæйæ, уæддæр æнустæм рох нæ уыдзæн, хæсты сывæллæттæ сæ рæстæгæй тынг æфхæрд кæй баййæфтой, уый.
Бæзиты-Бекъуырты Нинæ,
æхсæнадон уацхæссæг, фæллойы ветеран,
Октябрыхъæу
