РЦИ-Аланийы Сæргълæууæг Сергей МЕНЯЙЛОЙÆН Мæскуыйы фембæлд уыд Уæрæсейы транспорты министр Роман СТАРОВОЙТИМÆ. Ныхасы архайджытæ æрдзырдтой Цæгат Ирыстоны транспортон инфраструктурæйы дарддæры райрæзты нысантыл.
Роман Старовойт фембæлды райдайæны куыд фæнысан кодта, афтæмæй Цæгат Ирыстоны фæзуатыл сты, ахсджиаг нысаниуæг кæмæн ис, ахæм федералон фæндæгтæ æмæ паддзахадон арæны сæрты цæуæн цæстдарæн-уадзæн пункттæ. Уыцы объектты ахадындзинад хынцгæйæ, иудадзыгон цæстдард хъæуы сæ техникон уавæр æмæ æнæкъуыхцы куыстмæ.
Æппæт уыцы æууæлтæ зæрдыл даргæйæ, фембæлды архайджытæ æрдзырдтой цалдæр инфраструктурон объекты рацарæзтыл.
Зæгъæм, сæрмагонд æргом аздæхтæуыд уадзæн пункт «Дæллаг Зæрæмæг»-ы уавæрмæ. Паддзахадон арæныл уый у, Уæрæсе æмæ Хуссар Ирыстон чи бæтты, уыцы иунæг транспортон тæлм, фарон ацы пунктыл дыууæрдæм ахызтысты 422 мин транспортон иуæгæй фылдæр. Æрæджы райдыдта архайд «Дæллаг Зæрæмæг»-ы рацарæзтыл. Куыд нысангонд цæуы, афтæмæй цæстдарæн пункты бындурон цалцæг ахицæн уыдзæн 2027 азы. Уыцы куыстыты фæстæ пункты хъомыс зынгæ фæфылдæр уыдзæн: хæдтулгæтæн цæуæн фæндæгтæ дзы фæзындзæн 18 (ныртæккæ сты 10), суткæмæ та йыл цæудзæн 2,6 мин транспортон иуæджы (ныртæккæ – 300 машинæйы бæрц).
Ахæм бæстон ныхас рауад курорт «Цъæй»-мæ бацæуæн фæндæгты рацарæзтыл, регионы транспортон фæрæзтæ ног техникæйæ ивыныл. Уыцы нысантыл кусгæйæ, ахсджиаг у фыццаградон национ проект «Инфраструктурæ – фæрныг цардæн»-ы уагæвæрдтæ къæпхæнгай цардмæ рауадзын. Фембæлды архайджытæ разыйæ баззадысты, æппæт уыцы фарстатыл федералон æмæ регионалон ведомствæтæ æнгом æмархайд кæй кæнынц, уымæй. Роман Старовойт æмæ Сергей Меняйло уыдысты æмхъуыды: ахæм пайдайаг æмархайды фæрцы рæз-дзæн транспортон лæггæдты хæрзхъæддзинад, бæлццон адæмæн уыдзæн зæрдæзæгъгæ фадæттæ…
РЦИ-Аланийы
Сæргълæууæг
æмæ Хицауады
пресс-службæ
