Цæгат Ирыстоны æхсæнадон змæлд «Иудзинад»-ы уæнгтæ сæ сæйрагдæр нысаныл нымайынц, цæмæй рæзгæ фæлтæр æнувыд уой Райгуырæн бæстæйыл, уарзой мадæлон æвзаг, ма рох кæной нæ рæсугъд æгъдæуттæ. Уыцы нысанты сæраппонд йæ хъæппæрисæй арæзт цæуы, ныридæгæн традицион чи ссис, уыцы республикон конкурс-æркаст «Ирон дæн æз».
«Мах не ’ппæт дæр – Ирыстоны чызджытæ» – ацы ныхæстимæ сæхи бацамыдтой радон конкурсы архайджытæ: Дур-Дуры 2-æм скъолайы ахуырдзау Гæмаонты Аннæ, Æрыдоны 1-æм скъолайы ахуырдзау Еналдыты Жаннæ, Алагиры 3-æм скъолайы
ахуырдзау Гулиты Валерия, Джызæлы 1-æм скъолайы минæвар Гæ-джынаты Дианæ, Ольгинскæйы скъолайы ахуырдзау Белегкаты Аминæ, Комсомольскы хъæуы скъолайы ахуырдзау Хъуылаты Алинæ, Дзæу-джыхъæуы 36-æм скъолайы минæвар Гæззаты Илинæ æмæ Сырх-Дыгуры скъолайы ахуырдзау Рæмонты Ирмæ.
Ацы рæсугъд бæрæгбон арæзт æрцыд Дзæуджы-хъæуы Фæсивæды галуаны. Ерысы цы чызджытæ бацыд, уыдоны зонындзинæдтæн аккаг аргъ скæнынмæ æрбахуыдтой «Иудзинад»-ы советы уæнг, къорды сæрдар Мамытты Тамерланы, Бургалаты Заремæйы, Газайты Зояйы, Такъæты Ольгæ æмæ Гуыриаты Эльмирæйы.
Конкурсы архайджытæн æмæ æппæт уазджытæн арфæ ракодтой Мамытты Тамерлан æмæ РЦИ-Аланийы национ
политикæ æмæ æддагон бастдзинæдты министры хæдивæг Къуымæллæгкаты Олег.
– Ирон æгъдауæй, ирон æвзагæй хуыздæр ницы ис, æмæ сæ нæ кæстæртæ цæмæй цудын ма бауа-дзой, ууыл архайæм. Афæдз дыууæ хатты æрæмбырд вæййæм ацы бæрæгбонмæ. Районты уæлахиз-дзау чызджытæ сæхæдæг уалдзæгау куыд рæсугъд сты! Иууылдæр стут уæлахиздзаутæ, ныридæгæн кæй уарзут æмæ дзурут иронау, æгъдауæй, æфсармæй кæй стут хайджын, уымæй, – загъта Тамерлан.
– Национ политикæйы министрады номæй зæрдиаг арфæ кæнын конкурсы архайджытæн, уæлдай бузныг «Иудзинад»-ы уæнгтæн, сæ сæргъы – Мæрзойты Тамерлан, афтæмæй. Хъæппæрис равдыстат æмæ йæ уæхи фæрæзтæй рæсугъд аразут. Уырны мæ, чызджытæ, сæ хистæрты къахдзæфтыл цæугæйæ, сæ нысантæ кæй æххæст кæндзысты. Хæлардзинад æмæ уæздандзинад сæйрагдæр уæнт, – загъта
Къуымæллæгкаты Олег.
Конкурсы домæнтæм гæсгæ, фæсивæд дзырдтой сæ мыггаджы равзæрд æмæ абоны царды тыххæй. Сæ зонындзинæдтæ равдыстой, нæ фыдæлтæй нын чи баззад, уыцы ирон бæрæгбæттæ æмæ хæринæгтыл дзургæйæ. Стæй та залы бадæг адæмы базонгæ кодтой ирон чындзæхсæвы æгъдæуттимæ. Конкурсы радон æмæ кæронбæттæн аивадон æркасты чызджытæ сæ арæхстдзинад равдыстой кафынæй, зæрдæмæдзæугæ æмдзæвгæтæ кæсынæй. Сæхи хорз бацæттæ кодтой, уый бæрæг уыд. Иу иннæйы фæстæ хызтысты сценæмæ, къорды уæнгтæ та сæ алы æркастæн дæр хатдзæгтæ кодтой. Афтæмæй сбæрæг сты ерысы хуыздæртæ.
Республикон конкурс-æркаст «Ирон дæн æз»-ы уæлахиздзаутæ систы æртæ чызджы. Алагираг чызг Гулиты Валерия райста æртыккаг бынат, бацæттæ йæ кодта ахуыргæнæг Датиты Маринæ. Дыккаг бынат саккаг кодтой Джызæлы 1-æм скъолайы ахуырдзау Гæджынаты Дианæйæн. Арфæтæ райста йæ ахуыргæнæг Басилаты Людмилæ дæр.
Фыццаг бынат æмæ Кады гæххæтт радтой Æрыдоны 1-æм скъолайы ахуырдзау Еналдыты Жаннæйæн æмæ йæ ахуыргæнæг Лохты Ритæйæн.
Уæлахиздзаутæ æмæ сæ ахуыргæнджытæ райстой æхцайы премитæ æмæ зæрдылдарæн лæвæрттæ.
Арфæйы аккаг сты, бæрæгбон сæ аивадæй чи барæсугъд кодта, уыдон – Æрыдоны сывæллæтты сфæлдыстады хæдзары кафты къорд «Ногдзау», алагираг ансамбль «Осетия», Дур-Дуры Культурæйы хæдзары кафты ансамбль. Ольгинскæйы Культурæйы галуаны адæмон инструментты оркестр «Иры зæлтæ» та райста сæрмагонд преми.
– Алы ирон хæдзары дæр ахæм фæзминаг кæстæртæ бахъомыл уæд. Хæрзконд, хæрзæгъдау, уæ аив ныхасæй, уæ бакастæй зæрдæ рухс кæны. Бузныг уæ ныййарджытæн, уæ ахуыргæнджытæн. Не ’ппæты дæр абон баиу кодта ирондзинад, – загъта Цæгат Ирыстоны паддзахадон университеты ирон филологийы факультеты декан Гуыриаты Эльмирæ.
Гугкаты Жаннæ
