Уæрæсейы Президенты æртæ проекты гранттæ рамбылдтой ирыстойнæгтæ: Нартыхъæуы астæуккаг скъола, Дзæуджыхъæуы скъола-интернаты инклюзивон театралон студи «Созвездие» æмæ Мæздæджы Веселæйы хъæуы Калоты Георгийы номыл скъолайы медиацентр «Юность». Фæрæзтæ райсдзысты 500 минæй милуан сомы онг.
Грантты руаджы Нартыхъæуы скъолайы музейы бындурыл арæзт æрцæудзæн, нырыккон домæнтæн дзуапп чи дæтты, ахæм музей «Созвездие»- йы – сæ бон цæуын кæмæн нæу, уыцы сывæллæттæ æмæ уыдоны мадæлтæн театралон аивады фæрцы сараздзысты республикæйы иунæг гæнæнты фæз. Мæздæджы районы Веселæйы хъæуы сывæллæттæн та скъолайы байгом уыдзæн, профессион кусæнгæрзтыл кæм ахуыр кæндзысты сывæллæттæ æмæ сæ ныййарджыты, ахæм кълас.
Нартыхъæуы скъолайы коллективæн сæххæст сæ бæллиц: ныр сæ музей
рæстæджы домæнтæм гæсгæ рацаразынæн ис фадат. Уыцы гæнæн фæзынд, ныййарджыты æхсæнадты хъæппæристы конкурсы архайгæйæ, аразгæ та йæ скодтой уæрæсейаг æхсæнад «Знание» æмæ Уæрæсейы Рухсады министрад. Проекттæй иуы – «Окно в прошлое и будущее»-йы фæуæлахиз ацы хъæууон ахуыргæнæндон.
Скъолайы директор Алхазты Людмилæ, фыццаджыдæр, бузныг у сывæллæтты ныййарджытæй, уыцы хъуыды уыдонмæ фæзынд. Куыд радзырдта, афтæмæй музейы фæзындæн ис цымыдисаг истори. Йæ саразыны агъоммæ ивгъуыд æнусы æхсайæм азты скъолайы ахуырдзаутæ æмæ ахуыргæнджытæ, сæ сæргъы Цехъойты Ферузæ, афтæмæй кодтой сгарыны куыст, бæрæг кодтой, хъæу немыцаг фашисттæй хъахъхъæнгæйæ, чи фæмард, æмæ æфсымæрон ингæны кæй бавæрдтой, уыдоны нæмттæ. Æстайæм азты музейæн æрцыд бындур æвæрд, ис дзы бирæ экспонаттæ, сæ фылдæр баст сты Фыдыбæстæйы Стыр хæстимæ, стæй, нартыхъæуккæгтæй хъæбатырдзинад æмæ, цардархайды алы къабæзты æнтыстдзинæдтæ чи равдыста, уыдоны тыххæй æрмæджытæ.
Скъолайы бæстыхай æрæджы æрцыд бындурон цалцæг, фæлæ нырыккон домæнты аккаг музей домы уæлæмхасæн фæрæзтæ интерактивон стендтæ дзы сæвæрынæн. Æрыдоны районы ахуырады управленийы æххуысæй балæвæрдтой гæххæттытæ конкурсы архайынмæ, ууыл зæрдиагæй бакуыстой скъолайы ахуыргæнæг-организатор Цхуырбаты Мария æмæ хъомыладон фарстаты фæдыл директоры уынаффæгæнæг Голоты Маринæ. Равдыстой, куыд ахсджиаг у нырыккон фæрæзтæй музей сифтонг кæнын, куыд сахаддзæн уый рæзгæ фæлтæры патриотон хъомыладыл. Сбæлвырд уал кодтой, гранты фæрæзты фæрцы цы фарстатыл бакусдзысты, уый. Цхуырбаты Мария куыд зæгъы, афтæмæй музейы æрмæджытæй иутæ домынц иртасæн
куыст, хъæуы сæ сбæлвырд кæнын фæткмæ гæсгæ. Нырыккон тæрхæджы-
тæ æмæ интерактивон фæрæзтæй музей æрцæудзæн ифтонг.
Канд скъоладзаутæ æмæ ахуыргæнджытæн нæу ахсджиаг Президенты фонды грант рамбулыны цау, музей зынаргъ у хъæуы цæрджытæн дæр. Хуымæтæджы нæ фæзæгъынц хистæртæ, йæ ивгъуыд чи нæ зоны, уымæн фидæн дæр нæй, зæгъгæ.
ФÆРНИАТЫ Мæдинæ,
Нартыхъæуы скъолайы ирон æвзаджы
ахуыргæнæг
