Дзæуджыхъæуы Центрон библиотекæйы уыд педагогон фæллойы ветеран, Колыты Аксойы номыл премийы лауреат Таутиаты Минтæ æмæ Дзæуджыхъæуы Хетæгкаты Къостайы номыл Ирон литературæйы музейы хистæр зонадон кусæг, газет «Рæстдзинад»-ы сæрмагонд уацхæссæг Гасанты Валерийы арæзт чиныг «Арыхъхъ-Заманхъул»-ы дыккаг рауагъды презентаци. Чиныг мыхуыры рацыд æрæджы паддзахадон рауагъдад «Ир»-ы.
Презентацийы райдайæны йæ амонæг, Дзæуджыхъæуы Центрон библиотекæйы бæстæзонæн хайады сæргълæууæг Дзугаты Риммæ бæлвырд æмæ мидисджын афæлгæст сарæзта ног чиныджы сæргæндтыл æмæ æрдзырдта йæ мидисыл. Уæлдай æхсызгон та уый у, æмæ рухс кæй федта Заманхъулы равзæрды 190 азы юбилейы къæсæрыл.
Чиныг «Арыхъхъ-Заманхъул» саразыныл куыст цыд дыууæ азæй фылдæр. Цы æрмæг дзы ис, уымæн йæ иу хай ныффыстой чиныг аразджытæ æмæ Заманхъулы цæрæг адæм æмæ, уырдыгæй чи ралыгъд, ныр та нæ республикæ æмæ нæ бæстæйы алы горæтты цæрджытæ. Иннæ хай та ист у Национ наукон библиотекæйы фондтæй, республикæ æмæ Дзæуджыхъæуы архивтæй, музейты фондтæй, газеттæ «Рæстдзинад», «Северная Осетия», «Знамя коммунизма», «Рахизфарсы цард», «Вестник Беслана»-йы алы азты уагъд номыртæй.
Ног чиныг «Арыхъхъ-Заманхъул»-ы ахадындзинад æмæ хъомыладон нысаны тыххæй презентацийы сæ хъуыдытæ загътой нæ республикæйы Фысджыты цæдисы сæрдар, литературæиртасæг Хозиты Барис, йæ хæдивæг, фыссæг Цомартаты Изæтбег, Заманхъулы астæуккаг скъолайы уырыссаг æвзаг æмæ литературæйы ахуыргæнæг Карсанаты Радимæ, Æхсæнадон змæлд «Аланты Ныхас»-ы сæрдары хæдивæг Кучиты Руслан, ацы организацийы сылгоймæгты комитеты уæнг Агънаты Заремæ, Уæрæсейы Федерацийы культурæйы сгуыхт кусæг, фыссæг Дауыраты Дамир, чиныг-
уадзæн «Ир»-ы редактор Дзуццаты Зæлинæ, радио «Алани»-йы редактор, поэт Къадзаты Станислав, Дзæуджыхъæуы Центрон библиотекæйы сæргълæууæг, Заманхъулы хъæуæй рацæуæг Æгайты Зæлинæ.
Сæ зæрдæмæдзæугæ вокалон курдиатæй презентацимæ æрбацæуджытæ æмæ фысымты зæрдæтæ барухс кодтой нæ республикæйы адæмон артисткæ Персаты Тамарæ æмæ æрыгон зарæггæнæг Уаниты Назар.
Презентацийы кæрон йæ саразджытæ æмæ уазджытæн арфæ ракодтой чиныг «Арыхъхъ-Заманхъул»-ы саразджытæ Таутиаты Минтæ, Гасанты Валери æмæ фæллойы ветеран Таутиаты Никъала.
БУТАТЫ Азæмæт
