Ацы бонты Цæгат Ирыстонмæ кусæг балцы ссыдысты Мæскуы-
йы горæты Думæйы депутаттæ. Уыцы кусæг балцы фæлгæты знон Цæгат Ирыстоны Парламент æмæ Мæскуыйы горæты Думæ бафыстой парламентты ‘хсæн æмгуыстады бадзырд.
Документ бафыссыны размæ дыууæ закъонæвæрынадон оргæны минæвæрттæн уыд фембæлд. Уазджыты ‘рдыгæй дзы архайдтой: Мæскуыйы горæты Думæйы сæрдар Алексей Шапошников, Думæйы депутат, фракци «Иумæйæг Уæрæсе»-йы уæнг Татьянæ Батышева, Думæйы Фæндаггон-транспортон инфраструктурæ æмæ транспорты къамисы сæрдар, фракци «Иумæйаг Уæрæсе»-йы уæнг Сабинæ Цветкова, Мæскуыйы горæты Думæйы политикон парти «Новые люди»-йы номæй фракцийы разамонæг, Думæйы депутат Александр Даванков æмæ фракци «Иумæйаг Уæрæсе»-йы номæй Думæйы депутат Миленæ Авимская. Фысымты ‘рдыгæй фембæлды архайдтой: РЦИ-Аланийы Парламенты Сæрдар
Тускъаты Таймураз, Парламенты Сæрдары хæдивджытæ Гутнаты Аслæнбег æмæ Дойаты Светланæ, Парламенты арæзтадон политикæйы æмæ цæрæнуатон-коммуналон хæдзарады фарстаты фæдыл комитеты сæрдар Остъаты Георги æмæ закъонæвæрынады, закъонад æмæ бынæттон хиуынаффæйады комитеты сæрдар Черчесты Аслан.
Уазджытæн зæрдиаг æгасцуай загъта Тускъаты Таймураз.
– Абон цы бадзырд фыссæм, уымæн уыдзæн нæ иумæйаг бæстæйы технологон хæдбардзинад бахъахъхъæнынæн ахсджиаг фæстиуджытæ, – загъта Цæгат Ирыстоны Парламенты Сæрдар. Стæй уазджытæн радзырдта, республикæйы фæстаг азты царды æппæт къабæзты дæр цы арæзт æрцыд æмæ объекттæ аразынмæ, æппæт ног ивддзинæдтæм дæр депутатты ‘рдыгæй цавæр цæстдард ис, республикæйы муниципалон скондтæм ацæугæйæ, депутаттæ цы куыст бакæнынц æмæ уыцы куысты фæдыл хаст уынаффæтæ æххæстгонд куыд цæуынц, æппæт уыдæтты тыххæй.
Фысымтæн арфæ ракодта Алексей Шапошников. Уый фæстæ парламентаритæ æрныхас кодтой социалон-экономикон, культурон рæзты æмæ демографийы ахсджиаг фарстатыл æмæ, дыууæ регионы цы иумæйаг проекттæ æххæст кæндзысты, ууыл. Уазджытæ хæстæгдæр базонгæ сты Ирыстоны хъæздыг историон æмæ культурон бынтимæ, йæ хæстон намысимæ æмæ сбæрæг кодтой дарддæры æмархайды нысантæ.
Дыууæ парламенты ‘хсæн æмгуыстады бадзырд бафыстой: Мæскуыйы горæты Думæйы ‘рдыгæй – Сæрдар Алексей Шапошников, Цæгат Ирыстоны Парламенты ‘рдыгæй – Сæрдар Тускъаты Таймураз.
Закъонæвæрынадон архайдмæ, уæрæсейаг регионты ‘хсæн æмгуыстадмæ стыр бавæрæн кæй хæссы, уый фæдыл Тускъаты Таймураз Алексей Шапошниковы схорзæхджын кодта РЦИ-Аланийы Парламенты Кады гæххæттæй. Алексей Шапошников та цæгатирыстойнаг закъонæвæрынадон оргæны разамонæгæн скодта зæрдылдарæн лæвар.
Уый фæстæ Алексей Шапошников æмæ Тускъаты Таймураз фембæлдысты журналисттимæ æмæ сын сæ фарстытæн дзуаппытæ раттой.
– Ахæм фембæлдтыты фæрцы размæ цæуы социалон-экономикон æмæ культурон цард, рæзынц æмæ парахат кæнынц адæмы ‘хсæн ахастдзинæдтæ, – загъта Алексей Шапошников.
Канд Цæгат Ирыстон æмæ Мæскуыйы ‘хсæн нæ, фæлæ Уæрæсейы æппæт регионты ‘хсæн бастдзинæдты ахсджиагдзинад бафиппайдта Тускъаты Таймураз дæр.
– Ахæм бастдзинæдтæ сты нæ бæстæйы размæцыды сæйрагдæр рахæцæн, – загъта Цæгат Ирыстоны Парламенты Сæрдар.
ДЕДЕГКАТЫ Зæлинæ,
къам систа Татьянæ ШЕХОДАНОВА
