Сывæллæтты дзæбæхгæнæн лагерь «Стъалы» («Звездочка») æрбынæттон Цымийы хъæуы. Уым ныртæккæ райдыдта этнокультурон мадзал «Иры фидæн»-ы æртыккаг къæпхæн.
Æстдæс боны дæргъы æртын фондз æрыгон лæппу æмæ чызджы – дæсæй сты сæрмагонд æфсæддон операцийы архайджыты сывæллæттæ – зонгæ кæндзысты ирон æвзаг æмæ нæ культурæйы бындурон æууæлтимæ, архайдзысты мультипликацион кинонывтæ аразыны мастер-классты, хуыздæр базондзысты ирон кæфтыты аивад, бæстæзонæн дунейы сусæгдзинæдтæ.
Бæрæг кæндзысты нæ историон зæрдылдарæн бынæттæ æмæ республикæйы культурон центртæ. Фендзысты архитектурæйы зынгæ цыртдзæвæнтæ, бæстон сын
радзурдзысты нæ адæмы царды æгъдæуттæ æмæ традициты, æрмдæсныты, ирон адæмы удварны хæзнаты, Ирыстоны аивад æмæ культурæйы зындгонддæр
архайджыты тыххæй.
Сæ хъæздыг зонындзинæдтæ æмæ фæлтæрддзинадæй сын цæстуарзон хай бакæндзысты нæ дæсныдæр педагогтæ æмæ специалисттæ, сывæллæттæ ма базондзысты бирæ ног хабæрттæ нæ рагон истори æмæ адæмы царды зынгæдæр цаутæй.
Программæ чи бацæттæ кодта æмæ йæ царды чи уадзы, уыдоны сæйраг хæс нæ рæзгæ фæлтæр канд нæ хъæздыг культурон бынтимæ базонгæ кæнын нæу, фæлæ ма сæм хъомыл кæнын Райгуырæн бæстæмæ уарзондзинад, патриотизм, мадæлон æвзагыл æнувыд уæвын, йæ рæзтыл кусын. Æрмæст афтæмæй аккаг хуызы рацæудзыс-ты царды национ проект «Фæсивæд æмæ сывæллæттæ»-йы нысантæ.
РЦИ-Аланийы Ахуырад æмæ
наукæйы министрады
пресс-службæ
