Хетæгкаты Къостайы номыл паддзахадон университет æхсызгонæй сæмбæлд йæ фыццагкурсонтыл. Университеты Экономикæ æмæ разамынддæттыны факультет уæдмæ бацæттæ кодта фыццагкурсонтæн фондз проекты.
Ныр сæ царды уадздзыстæм æмхуызонæй. Сæ иу, «Деканимæ – сахаты дæргъы», уыдзæн алы мæй дæр иу хатт. Факультеты декан сæрæндæр студенттимæ æмбæлдзæн æмæ, фынджы уæлхъус цай цымгæйæ, дзурдзæн факультеты царды ахсджиагдæр фарстатыл.
Раст зæгъгæйæ, студентты бирæ фарстатæ тыхсын кæнынц, суанг культурон-дзыллон хабæрттæй райдай æмæ хъуыддæгтæ аразыны нысантæй фæу, стипендийы, коммерцион хуызæй бюджетмæ раивыны фарсты онг.
«Музакалон сахат»-ы руаджы студенттæн сæ бон у сæ курдиаты æууæлтæ равдисын. Алы мæй дæр иу хатт æрæмбырд вæййынц факультеты студенттæ, чи сæ цæмæ æмхиц у, уый æвдисынц. Музыкалон инструменттыл цæгъдынц, кафынц, зарынц,
æмдзæвгæтæ кæсынц. Проект «Чемпионимæ зарядкæ» нысангонд у æнæниз царды уаг парахат кæнынмæ. Канд студенттæ нæ, фæлæ ахуыргæнджытæ дæр æрлæууынц, нæхи фæсивæдæй сæхи спорты чи равдыста, бирæ хæттыты чемпионтæ æмæ призты хицæуттæ чи систы, уыдоны раз æмæ зарядкæ скæнынц.
Проект «Экономикæ – царды сæрвæлтау»-ы фæрцы нæ факультеты студенттæ рæгъмæ рахæссынц æмæ æрныхас кæнынц æхсæнадон фарстатыл. Афтæ дæр рауайы, æмæ ссарынц тæккæ ахсджиагдæр рахизæнтæ. Проект «Хъæбатыримæ – сахат»-ы фæрцы факультеты студенттæ арæх æмбæлынц сæрмагонд æфсæддон операцийы архайджытимæ.
Æппæт ацы проекттæ нæ факультеты студенттæн фадат дæттынц сæ дарддæры рæзтæн, бæрзонд квалификациимæ специалисттæ экономикæйы къабазæн цæттæ кæнынæн.
Геннадий Родионов,
ЦИПУ-ы экономикæ æмæ разамынддæттыны факультеты декан
