Цæгат Ирыстонмæ уазæгуаты мультимедион проект «Уый Кавказ у»-йы пресс-туры фæлгæты ссыдысты Уæрæсейы раззагдæр дзыллон мыхуыры фæрæзты дæс журналисты. Цыппар боны дæргъы бæстæйы егъаудæр медиафæрæзты минæвæрттæ зонгæ кæндзысты Цæгат Ирыстон, Кæсæг-Балхъар æмæ Стъараполы крайы экономикон æмæ туристон гæнæнтимæ.
РЦИ-Аланийы Сæргълæууæг Сергей Меняйлойы фæдзæхстмæ гæсгæ пресс-туры архайджытимæ – «Российская газета», «Известия», «Комсомольская правда», Лента.ру, Газета.ру, «Метро», «Афиша Daily», «Вокруг света», АТОР, Marie Claire-йы журналисттимæ фембæлд республикæйы экономикон рæзты министр Сокаты Марат. Ныхас рауад бирæвæрсыг – уазджытæ стыр цымыдисдзинадимæ лæвæрдтой
фарстатæ регионы туристты нымæцы рæзты, экономикæйы сæйраг рахæцæнты, царды уагъд ахадгæдæр инвестицион проектты тыххæй.
– Туризм у республикæйы социалон-экономикон рæзты ахсджиаг æмæ зынгæ хай, фæстаг къорд азы хорз рæзы æмæ æнæдызæрдыг, у экономикæйы алы къабазы рæзты сæйраг хотых, уæлдайдæр та Цæгат Кавказы федералон зылды. Нæ регион дзæнæтон рæсугъд бынаты ис, хъæздыг сты нæ культурæ, традицитæ, истори, хæххон курорттæ, рекреацион æмæ реабилитацион центртæ саразыны гæнæнтæ. Уый та у республикæйы экономикон рæзты бындур, дæтты фадат ног куысты бынæттæ саразынæн, зæрдæмæдзæугæдæр кæны республикæйы туристон «цæсгом», – фæбæрæг кодта Сокаты Марат.
Проект «Уый Кавказ у»-йы пресс-туры рæстæг журналисттæ, регионы хицауады минæвæрттимæ фембæлдтытæй уæлдай, базонгæ уыдзысты ног æппæтафоны туристон-рекреацион комплекс «Мамысон»-имæ.
Уæ зæрдыл уын лæууын кæнæм: ТАСС-ы Информацион-æмбарынгæнæн мультимедион портал «Уый Кавказ у» арæзт æрцыд 2015 азы 16 сентябры. Дæс азы дæргъы сайты ныммыхуыр кодтой цыппар мин алыхуызон æрмæджы æмæ 50 мин информацион хъусынгæнинаджы Цæгат Кавказы федералон зылды цардыл. Проект æрвылаз журналисттæ æмæ блогертæн саразы балц Цæгат Кавказы регионтæм
Уæрæсейы Экономикон рæзты министрадимæ æмгуыстады бындурыл. Бынæттон хицауады оргæнтимæ бастдзинады руаджы журналистты зонгæ кæнынц федералон зылды экономикон, туристон æмæ инвестицион гæнæнтимæ, афтæмæй æнæсайд, раст информаци хæццæ кæны аудиторимæ.
ГАПБАТЫ Алетæ
