Цæгат Ирыстоны Хетæгкаты Къостайы номыл паддзахадон университеты фембæлдысты дыууæ уæлдæр ахуыргæнæндоны – ЦИПУ æмæ Новосибирскы паддзахадон университеты студенттæ. Мадзалы архайдтой фæсивæдон политикæйы проректортæ Денис Обуховский (НПУ) æмæ Кокайты Алан (ЦИПУ), алыхуызон фæсахуырты архайд æвдисæг студенттæ-активисттæ, профцæдисон организаци, спортивон иугæндтæ, бархионты центртæ æмæ æндæр ахæм структурæты минæвæрттæ.
Фембæлды сæйрагдæр нысан уыд, университетты царды рæзты зæрдиагæй чи архайы, уыцы студентты ’хсæн æргом æмæ пайдайаг ныхас. Фæсивæд кæрæдзи-
йæн дзырдтой, алыхуызон мадзæлттæ куыд бацæттæ кæнынц, ныхас кодтой сæ ахуыргæнæндæтты студентон хиуынаффæйады хицæн-дзинæдтыл, активон æмæ бæрнон студентон æхсæнад аразынæн пайда чи у, ахæм хъæппæристыл. Ома, фæсивæдон проекттæн æххуысы мадзæлттыл, университетты администрацитимæ æмгуыстад, студентты æргом æрвылбоны цард, ахуыры рæстæг æмæ фæсахуыры активон архайдмæ раздахын.
ЦИПУ-йы студенттæ уазджытæн радзырдтой, ног ахуыры азы ЦИПУ-йы цы ахсджиаг хъæппæрис фæзынд, уый тыххæй: факультетты арæзт æрцыдыс-ты студентон арæзтадон къордтæ. Разамынд та сын дæтты студент-раздзог. Ахæм къордтæ архайынц хæдзарадон-æрвылбоны царды фарстатæ лыг кæнын æмæ факультетты уавæртæ фæхуыздæр кæныны хъуыддæгты, æмгуыст кæнынц коменданттæ æмæ университеты æндæр службæтимæ. Ахæм архайд студенттæм рæзын кæны бæрнондзинад æмæ разамонæджы миниуджытæ, фидар кæны администраци æмæ студентты ’хсæн бастдзинæдтæ.
Фембæлды ма ныхас цыд историон зæрдылдард æмæ граждайнаг бæрнондзинадыл. Новосибирскы паддзахадон университеты минæвæрттæ радзырдтой, æрвылаз Беслæны теракты амæттæгты тыххæй цы мысæн мадзал саразынц, уый тыххæй. Ахуыргæнджытæ æмæ студентты ахæм хъæппæрис арæзт цæуы, цæмæй, 2004 азы цы фыдбæллæх æрцыд, уый рох ма уа, фæсивæды зæрдæты тæригъæддзинад æмæ баххуыс кæнынмæ цæттæдзинады æнкъарæнтæ рæзын кæнынæн.
ЦИПУ-йы проректор Кокайты Алан сын уый фæдыл арфæ ракодта æмæ бахаста фæндон, цæмæй иннæ аз ЦИПУ-йы делегаци ацæуа Новосибирскмæ, æмæ Цæгат Ирыстоны студенттæ сæ зæрдиаг æвæрæн бахæссой уыцы мысæн мадзалмæ.
Дарддæр ма æмбырды архайджытæ æрныхас кодтой бархиондзинад æмæ патриотон змæлды рæзтыл, сфæлдыстадон æмæ спортивон хъæппæристæн æххуыс æмæ фидæны ЦИПУ æмæ НПУ-йы æмгуыстадыл.
Ахæм фембæлдтытæ ахъаз сты уæлдæр ахуыргæнæндæттæ æмæ студентты ’хсæн ахаст-дзинæдтæ фидардæр кæнынæн.
ЦИПУ-йы
пресс-службæ
