Дзæуджыхъæуы кæронмæ æрхæццæ сты Гагарины уынджы скверы бындурон рацарæзты
куыстытæ.
Уый тыххæй йæ телеграм-каналы фехъусын кодта горæты бынæттон хиуынаффæйады администрацийы сæргълæууæг Милдзыхты Вячеслав.
Администрацийы разамонæджы хъуыдымæ гæсгæ, ныр горæты цæрджыты фæлладуагъд æмæ тезгъойæн уыцы æхсæнадон тæлмы ис зæрдæзæгъгæ фадæттæ: аив къæйдурæй æмбæрзт къахвæндæгтæ, хæрззылд газонтæ, бандæттæ…
«Гагарины уынджы сквер рагæй рацаразинаг уыд. Æмæ нын ныр фадат фæзынд уыцы фæлладуадзæн тæлммæ базилынæн. Бынæттон цæрджытæ ныр уым уæнгрогæй æрвитынц сæ рæстæг, — бафиппайдта Милдзыхы-фырт. – Амæй фæстæмæ дæр сæрмагонд æргом здахдзыстæм, горæты центрон районæй дæрддзæф чи у, уыцы сквертæ æмæ иннæ фæллад-уадзæн бынæтты уавæрмæ. Кæй зæгъын æй хъæуы, ног микрорайонты цæрджыты зæрдæйы ахастыл комкоммæ ахады сæ алфамбылай фæзуæтты фæлгонцад. Уый иудадзыгдæр ис боны фæткы фарстаты ’хсæн».
Зæгъын хъæуы, скверы рацарæзт фыццаградон национ проект «Инфраструктурæ – цардæн»-ы фæлгæты æххæстгонд кæй æрцыд, уый дæр. Уыимæ, уыцы проект æмæ сæрмагонд муниципалон программæты фæрцы ацы азы цалцæ-джы пълантæм бахастой ноджыдæр ма цалдæр æхсæнадон фæлладуадзæн тæлмы. Кæцыдæр объектты цалцæг ныридæгæн ахицæн, кæцыдæртыл нырма архайд цæуы…
Нæ уацхæссæг
