Ацы бонты горæт Геленджикы йæ куыст кодта дунеон инновацион форум «Биопром-2025». Æмбырды архайæг уыдысты Цæгат Ирыстоны Хетæгкаты
Къостайы номыл паддзахадон университеты минæвæрттæ дæр.
Форумы архайджытæ бæстон æрдзырдтой медицинæйы, фармацевтикæйы, хойраджы промышленносты, хъæууон хæдзарады, экологи æмæ иннæ къабæзты нырыккон инновацион технологиты фæрцы адæймаджы æрвылбоны цард хуыздæр æмæ фæрныгдæр кæныныл, рæгъмæ рахастой амынд фарстатыл кусæг æнтыстджындæр наукон æмæ куыстадон компаниты фæлтæрддзинад.
Æмбырды архайджытæ сæрмагонд æргом аздæхтой биоэкономикæйы райрæзт æмæ уыимæ баст фарстатæм, фæбæрæг кодтой цымыдисагдæр проекттæ æмæ ног технологон продуктты ахадын-дзинад.
Конференцийы пленарон æмбырды архайдтой федералон Хицауады Сæрдары хæдивæг Денис Мантуров, министрадтæ æмæ ведомствæты разамонджытæ, уæрæсейаг æмæ фæсарæйнаг компаниты специалисттæ, регионты минæвæрттæ… Пленарон æмбырды цы докладтæ уыд, стæй секцион æмбырдты цы быцæуныхас рауад, уыдонæн хорз аргъ скодтой Цæгат Ирыстоны минæвæрттæ – ЦИПУ-йы ректор Огъуаты Алан, æрдззонæн наукæтæ æмæ технологиты факультеты декан Сергей Скупневский æмæ медицинон факультеты фармацийы кафедрæйы сæргълæу-уæг Вячеслав Морозов. Ирыстойнаг университеты минæвæрттæн уæлдай фадат фæцис зындгонд уæрæсейаг æмæ фæсарæйнаг компаниты минæвæрттимæ фембæлынæн, фидæны иумæйаг наукон-практикон проекттæ фæнысан кæнынæн.
КАЛМАНТЫ Аслан
