Компани «Газпром межрегионгаз Владикавказ»-ы лæггæдтæй чи пайда кæны, уыцы фæлхасгæнджытæй 152 минæй фылдæр хардзгонд газæн сæ фиддонтæ кæнынц нымайæн приборты бæрæггæнæнты бындурыл. Уыимæ, уыцы счетчикты зынгæ хайы техникон уавæр азы кæронмæ хъуамæ специалисттæ раиртасой.
Уый тыххæй фехъусын кодта энергетикон компанийы пресс-службæ.
Куыстуаты минæвары ныхасмæ гæсгæ, нымайæнты техникон уавæрмæ цæст дарын у абоненты хæстæй иу. Уыимæ, счетчикы техникон уавæры раиртæст арæзт хъуамæ цæуа цалдæр азæй цалдæр азмæ (уыцы æууæл баст у, нымайæн цавæр бæстæ æмæ компанийы сарæзтой, уыимæ). Уымæ гæсгæ, зæгъæм, кæцыдæр счетчиктæн техникон раиртæст аразын хъæуы 6 азы иу хатт, кæцыдæртæн та – 12 азы иу хатт.
Ам ма фæлхасгæнджыты зæрдыл æрлæууын кæнын хъæуы иу ахсджиаг хъуыддаг. Счетчикæн йæ техникон раиртæсты рæстæг куы ралæууа, фæлæ йæ фæлхасгæнæг афойнадыл техникон службæмæ куы нæ бавдиса, уæд ын газы фиддонтæ нымайын райдайдзысты нормативон бæрæггæнæнтæм гæсгæ (ома, техникон æгъдауæй цауд приборы нымæцтæм каст нал цæудзæн). Уыцы æууæл та, гæнæн ис, æмæ расайа хардзгонд газы фиддоны зынгæ рæзт.
«Фæлхасгæнджыты фылдæр хай æмбары нымайæнты пайда æмæ уæрæх архайы уыцы прибортæй. Уый фæрцы фиддон бабæстон æмæ фæкъаддæр вæййы. Фæлæ счетчик йæхимæ домы цæстдард. Йæ техникон уавæры раиртæсты æмгъуыд куы фæивгъуыйа, уæд нормативон фиддон йæ тыхы бацæуы, æмæ, квитанциты цы нымæцтæ вæййы, уыдон сырæзынц. Цæмæй афтæ ма уа, уый тыххæй сидын æппæт абоненттæм дæр – афойнадыл æххæст кæнут уæ нымайæн приборты техникон раиртæст», – зæгъы «Газпром межрегионгаз Владикавказ»-ы генералон директор Хъо-
дзаты Алан.
Нымайæнты техникон раиртæсты æмгъуыдты тыххæй бæрæггæнæнтæ сты приборæн йæ паспорты, кæнæ та сæ базонæн ис онлайн-сервис «Хи кабинет»-ы. Уымæй уæлдай, ацы фарст бадæттæн ис «Газпром межрегионгаз Владикавказ»-ы колл-центрмæ дæр ахæм телефонæй: 8-800-550-00-04. Центры кусджытæ фæлхасгæнæгæн бацамондзысты счетчикы техникон раиртæст саразыны фæтк.
Нæ уацхæссæг
