РЦИ-Аланийы Сæргълæууæг Сергей МЕНЯЙЛОЙÆН Мæскуыйы фембæлд уыд Уæрæсейы Нывкæнынады академийы уæнгуацхæссæг, нырыккон аивады æппæтуæрæсеон фестиваль «Видеть и слышать»-ы генералон продюсер Дмитрий ТРОФИМОВИМÆ. Ныхасы архайджытæ æрдзырдтой культурæ æмæ аивады къабазы æмгуыстадыл, иумæйаг сфæлдыстадон проекттыл.
Дмитрий Трофимов цы проекттыл кусы, уыдон баст сты чырыстон динимæ. Уыцы æууæл хынцгæйæ, фæндон хаст æрцыд, цæмæй Цæгат Ирыстон уæрæхдæр архайа, сфæлдыстадон æрмадз «Царьград» (уый дæр ис Дмитрий Трофимовы бæрны) цы культурон-удварнон мадзæлттæ аразы, уыдоны. Сæ иу – уæлдæр амынд нырыккон аивады æппæтуæрæсеон фестиваль «Видеть и слышать». Уым уæрæх æвдыст æрцæуынц, чырыстон дины истори æмæ абоны цардимæ æнгом баст чи сты, уыцы аивадон æмæ музыкалон уацмыстæ. Фестивалы æрвылаз зæрдиагæй архайынц бирæ уæрæсейаг регионты минæвæрттæ.
Фестивалы программæ хъæздыг вæййы алыхуызон лекцитæй, кинонывтæй, равдыстытæй, мастер-класстæй, бæстæзонæн балцытæй, концерттæ æмæ æндæр ахæм мадзæлттæй. «Проекты сæйрагдæр нысан у культурон-рухстауæн куыст, ног фæлтæрты фыдæлтыккон удварнон хæзнатыл хъомыл кæнын», – радзырдта Дмитрий Трофимов.
Сергей Меняйло зæрдыл æрлæууын кодта, цалдæр азы размæ Ирыстон æмæ æппæт Уæрæсе Аланыстоныл саргъуыды 1100 азы кæй сбæрæг кодтой, уый. «Уыцы ахсджиаг историон-культурон цау ма иу æвдисæн ссис, нæ адæм æнгом кæй сты, ног фæлтæртæ фыдæлтыккон удварнон хæзнатыл æнувыд кæй сты, уымæн», – бафиппайдта Цæгат Ирыстоны Сæргълæууæг.
Фембæлды архайджытæ куыд баныхас кодтой, афтæмæй хæстæгдæр рæстæг бæлвырдгонд æрцæудзысты фыццаградон иумæйаг проекттæ.
РЦИ-Аланийы
Сæргълæууæг æмæ
Хицауады
пресс-службæ
