Мæздæджы районы Винограднæйы хъæуы библиотекæйыл ивгъуыд къуырийы сæххæст нæуæдз азы, æмæ уыцы цау кадджын уавæры сбæрæг кодтой хъæуы цæрджытæ. Бæрæгбонмæ бирæ уазджытæ æрбацыд, æрмæст Мæздæджы район æмæ Цæгат Ирыстонæй нæ, фæлæ ма сыхаг регионтæй дæр.
Хъæуы библиотекæ æхсæнадон æмæ культурон царды центр у, куы зæгъæм, уæд рæдыд нæ уыдзæн. Ныртæккæ лæвар лæггæдтæ тынг стæм сты, уæхи зæрдæ – уе ‘вдисæн, фæлæ библиотекæйы лæвар райсын æмбæлы, дæ зæрдæ дын чи агайы, уыцы фысджыты чингуытæ. Винограднæйы хъæуы библиотекæйы та ма ссарын æмбæлы, ныртæккæ, «библиографион стæмдзинад» кæй хонынц, ахæм чингуытæ – ивгъуыд æнусы райдайæны федтой рухс, сæрмагонд стенд сын арæзт ис, цæсты гагуыйау сæ хъахъхъæнынц. Æдæппæтæй та библиотекæйы фонды ис 14 мин чиныджы. Йæ архайд хъæуы æппæт социалон къордтыл дæр æххæссы, æххуыс сын кæны куыд ахуыры, афтæ хи зонындзинæдтæ фæбæрзонддæр кæнынæн дæр.
Ацы аив бæстыхайы сæргъы лæууы Дзуццаты Ольгæ – рæсугъд уды хицау, зæрдæхæлар, йæ куыстмæ æрвылбон бæрæгбонау чи цæуы, ахæм хæрзаив сылгоймаг. Бирæ цымыдисаг хабæрттæ нын радзырдта библиотекæйы историйæ, æмæ нæ газеты фæстæдæр номырты уый тыххæй лæмбынæг æрмæг мыхуыр кæндзыстæм.
Мæнæ гыццыл чызг æрбахызт къæсæрæй, йæ къухы – уæззау хызын. Скъолайæ рацыд дыккæгæм къласы ахуырдзау Къуымситы Аланæ æмæ йæ фæндаг биб-
лиотекæйыл ракодта. Йæ къухы – Хетæгкаты Къостайы фыст «Дзæбидырдзуаны». Чиныг афтæ арæзт у, æмæ текст бакæсын æмбæлы иронау дæр, уырыссагау дæр.
Ольгæ чызджы бафарста, дæ зæрдæмæ фæцыд, зæгъгæ, æмæ разыйы
дзуапп куы райста, уæд Аланæйæн загъта, уæдæ, дам, дæхицæн чингуытæ равзар.
Аланæ, дзæбæх гыццыл æгъдауджын чызг, уарзы кæсын, библиотекæйы арæх вæййы. Мæнæ ныр дæр равзæрста Алексей Толстойы фыст «Золотой ключик или приключения Буратино», «Сказки о русских богатырях» – ставд джиппæй фыст, рæсугъд ирд нывтимæ – хуыздæр ма цы уа!
Дзуццаты Ольгæ куыд зæгъы, афтæмæй чиныгдон адæмæй цух никæд вæййы – æрбацæуынц æрмæст скъоладзаутæ нæ, фæлæ ас-
тæуккаг æмæ хистæр кары хъæуы цæрджытæ дæр. Уый та ууыл дзурæг у, æмæ, афтæ чи зæгъы, чиныг нал хъæуы, алы авторы сфæлдыстадимæ дæр нымæцы фæрцы базонгæ уæвын æмбæлы, зæгъгæ, уыдон рæдийынц. Чиныг къухмæ райсын, рафæлдахын æй – уыцы æнкъарæнтæн абарæн ницæимæ ис!
ГАПБАТЫ Алетæ
