Дзæуджыхъæуы бынæттон хиуынаффæйады администрацийы горæты хæдзарады уавæрмæ цæстдарды управленийы кусджытæ, рейдтæ æххæст кæнгæйæ, ивгъуыд къуырийы дæргъы сарæзтой административон æгъдаухæлдтыты тыххæй 20 суагъæйæ фылдæр.
Управленийы специалисттæ сæ цæст дарынц алыхуызон административон æгъдаухæлдтыты профилактикæ æмæ ахæм цауты фæстиуджытæ иуварс кæныны хъуыддагмæ. Куы иу, куы иннæ ран горæты уынгты фæзынынц базаргæнджытæ, чидæртæ сæ хæдтулгæтæ газонтæм батæрынц, иннæтæ бырæтты дзæкъултæ уынгтæм раппарынц, телыхъæдтæ æмæ æндæр фæзуæттыл та андадзынц рекламон кæнæ информацион хъусынгæнинæгтæ…
Æппæт уыцы цаутимæ тох кæнынц управленийы кусджытæ. Зæгъæм,
ивгъуыд къуырийы цæстдарæн мадзæлттæ æххæст кодтой Владикавказаг, Владивостокаг, Дзусы-фырты, Къесайы-фырты æмæ æндæр горæтаг уынгты.
Управленийы специалисттæ куыд зæгъынц, афтæмæй административон æгъдаухæлдтыты фылдæр хай баст у æнæзакъон базарад æмæ хæдтулгæтæ цъæхвæлысты тæлмытыл æвæрынимæ. Ацы хатт дæр цалдæр ахæм
цауимæ сæмбæлдысты. Базаргæнæг адæмæн амынд æрцыд, цæмæй сæ хиконд тæрхæджытæ æмæ уæйгæнинæгтæ аиуварс кæной, газонтыл цы хæдтулгæтæ баййæфтой, уыдон та иварон фæзмæ аластой…
Æппæт бæрæггонд æгъдаухæлдтыты фæдыл дæр арæзт æрцыд протоколтæ. Æмæ æрмæст суагъæтæ нæ саразынц управленийы кусджытæ, фæлæ сæ цæст дарынц, административон æгъдаухæлды фæстиу-джытæ куыд иуварсгонд цæуой, уымæ дæр.
Дзæуджыхъæуы бынæттон хиуынаффæйады администрацийы минæвар куыд радзырдта, афтæмæй ахæм цæстдарæн мадзæлттæ æххæстгонд цæуынц горæты æппæт районты дæр сæрмагонд пъланы бындурыл.
Дмитрий АСТАХОВ
