Уæрæсейы Федерацийы Рухсады министрады куыст цæуы, цæмæй 2028 азмæ скъолайы предметтæй алкæцыйæн дæр уа иумæйаг ахуыргæнæн чингуытæ.
Ахæм хъусынгæнинагимæ рухсады министр Сергей Кравцов раныхас кодта, УФ-йы Федералон Æмбырды уæллаг палатæйы Наукæйы, ахуырад æмæ культурæйы фарстаты фæдыл комитеты æмбырды.
Министры ныхасмæ гæсгæ, профилон ведомствæ уыцы фарстайыл æмархайд кæны Уæрæсейы Наукæты академийы иртасæн институттимæ иумæ. Уыимæ, ахæм ахуырадон пособитыл кусгæйæ, чиновникы хъуыдымæ гæсгæ, зæрдылдаринаг у, нау-
кæ стыр санчъехтæй размæ кæй цæуы, нырыккон нымæцон технологитæ царды æппæт къабæзтыл зынгæ кæй ахадынц, уыцы æууæл дæр. «Ныртæккæ ахæм иумæйаг ахуыргæнæн чиныг ис æрмæстдæр историйæ», – загъта Сергей Кравцов.
Раныхасгæнæг куыд бафиппайдта, афтæмæй уыцы архайды сæйрагдæр нысан у, цæмæй æппæт бæстæ дæр суа «иумæйаг ахуырадон тыгъдад, цæмæй æппæт
регионты скъоладзаутæ дæр Иумæйаг паддзахадон æмæ иннæ фæлварæнтæм сæхи цæттæ кæной иухуызон программæтæ æмæ ахуырадон пособиты фæрцы».
Ахæм куыст растыл банымайгæйæ, сенатортæ æмæ иннæ эксперттæ бахастой фиппаинæгтæ æмæ фæндæттæ дæр, профилон ведомствæйы разамонæджы æргом аздæхтой бæлвырд фарстатæм.
Зæгъæм, сæ хъуыдымæ гæсгæ, ахуырадон чингуытæ æгæр зынаргъ сты. Финансты федералон министры хæдивæг Павел Кадочников куыд бафиппайдта, афтæмæй иу ахуыргæнæн чиныджы аргъ рæстæмбис нымадæй у 700 сомы бæрц. Чиновникы ныхасмæ гæсгæ, бацархайын хъæуы, цæмæй ахæм пособиты аргъ 500 сомæй фылдæр ма уа.
Павел Кадочников фехъусын кодта ахæм нымæцтæ дæр: 2024 азы уæрæсейаг регионтæ ахуыргæнæн чингуытæ æлхæныныл схардз кодтой 34 миллиард сомы бæрц.
Æмбырды архайджытæ цы фæндæттæ бахастой, уыдон сæ бынат ссардтой комитеты амынддзинæдтæ æмæ уынаффæты.
(«ТАСС»)
