Уыд Республикæ Цæгат Ирыстон-Аланийы Парламенты Советы радон æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст федералон æмæ республикон закъонты проекттæ æмæ Уæрæсейы Федерацийы иуæй-иу субъектты закъонæвæрынадон хъæппæристæ.
Советы уæнгтæ байхъуыстой «Нырыккон горæтаг уавæртæ аразын»-ы паддзахадон программæйы мадзæлттæ æххæст кæнынæн 2023-2024 азты республикæйы Цæрæнуатон-коммуналон хæдзарад, артаг æмæ энергетикæйы министрадæн республикон бюджетæй æрвыст фæрæзтæй закъонмæ гæсгæ куыд пайдагонд æрцыд, стæй, цас хæдзардзинæй», уый тыххæй республикæйы Цæстдарæн-нымайæн палатæйы хъусынгæнинагмæ. Раныхасгæнæг уыд аудитор Айларты Алан.
Раныхасгæнæг куыд загъта, афтæмæй цæстдарæн мадзæлттæ арæзт æрцыдысты республикæйы Парламенты фæдзæхстмæ, стæй Палатæйы куысты пъланмæ гæсгæ. Амынд программæйы архай-джытæ уыдысты республикæйы муниципалон скондты бынæттон хиуынаффæйады оргæнтæ. Программæ æххæстгонд цæуы дыууæ къæпхæнæй: фыццаг – 2018-2023 азтæ æмæ дыккаг – 2024-2030 азтæ. Программæйы фыццаг къæпхæны азты арæзт æрцыд бирæфатерон хæдзæртты кæртытæ 450, 190 та – æхсæнадон фæзуæттæ. Æппæт куыстытæн дихгонд уыд 759 милуаны æмæ 889 мин сомы, уыдонæй 710 милуаны æмæ 280 мин сомы уыдысты федералон бюджеты æхцатæ, 49 милуаны æмæ 608 мин сомы та – республикон бюджеты æххуыс.
2023-2024 азты программæйы фæрцы сæ хуыз аивтой æмæ нырыккон уавæртæ арæзт æрцыд 45 бирæфатерон хæдзары кæрты æмæ 81 æхсæнадон бынаты. Уыимæ, æххæстгонд æрцыдысты фæлладуадзæн нырыккон уавæртæ аразыны цыппар проекты: дыууæ – Беслæны, фæйнæ иуы та – Дигора æмæ Æрыдоны.
Айлары-фырты ныхасмæ гæсгæ, иуæй-иу объектты куыстытæ се ‘мгъуыдтæм гæсгæ кæронмæ нæ ахæццæ сты, уымæ гæсгæ 9 мил-уаны æмæ 145 мин сомы базза-
дысты æнæхардзгондæй. «Куыстытæ 2024 азæй рахастой 2025 азмæ, фæлæ ныр дæр æххæстгонд не ‘рцыдысты. Уый аххосæй, гæнæн ис, æмæ республикæ иваргонд æрцæуа», – загъта раныхасгæнæг.
Фарстайы фæдыл æмдоклад скодта Парламенты цæрæнуатон-коммуналон хæдзарады фарстаты фæдыл æмæ арæзтадон политикæйы комитеты сæрдар Остъаты Георги.
«Ветеранты тыххæй» федералон закъонмæ ивддзинæдтæ бахæссыны тыххæй» федералон закъоны проекты фæдыл ныхас кодта Парламенты социалон политикæ, æнæниздзинад хъахъхъæнынад æмæ ветеранты хъуыддæгты фæдыл комитеты сæрдар Реуазты Ларисæ. Документы нысан – хæстон цауты ветеранты социалон æгъдауæй бахъахъхъæнын. Закъоны проект сын дæтты уæлæмхасæнæй 35 къæлиндарон боны онг фæлладуадзæн бонтæ сæхи хардзæй райсыны бар.
Парламенты национ политикæ æмæ фæсивæды хъуыддæгты фæдыл комитеты сæрдары хæдивæг Саулохты Сæрмæт æркæсынмæ рахаста «Уæрæсейы хæстон намысы æмæ зæрдылдарыны бонты тыххæй» федералон закъонмæ ивддзинæдтæ бахæссыны тыххæй» федералон закъоны проект. Уым куыд амынд ис, афтæмæй нырæй фæстæмæ алы аз дæр 19 апрелы Уæрæсейы бæрæггонд хъуамæ цæуа, «1941-1945 азты Фыды-бæстæйы Стыр хæсты рæстæг нацисттæ æмæ сæ хъузæттæ советон адæмы ныхмæ цы геноцид сарæзтой, уый амæттæгты æрымысыны бон». Закъонæвæрынадон хъæппæрис равдыстой Паддзахадон Думæйы депутаттæ. Тускъаты Таймураз куыд бафиппайдта, афтæмæй документы нысан у историон рæстдзинад бахъахъхъæнын æмæ, Фыдыбæстæйы Стыр хæсты Уæлахиз советон адæмы фæрцы кæй уыд, уыцы цытджын историон цау зылынгæнæн фæлварæн митæй бахъахъхъæнын.
Советы уæнгтæ ма цы закъонты проекттæ равзæрстой, уыдоны фæдыл ныхас кодтой Парламенты профилон комитетты сæрдартæ Еленæ Князева æмæ Киситы Мурат.
Уымæй уæлдай, депутаттæ сфидар кодтой Парламенты радон æмбырды боны фæтк æмæ йæ саразыны æмгъуыд.
ДЕДЕГКАТЫ Зæлинæ
