Хæххон аграрон паддзахадон университеты 12 студенты систы Уæрæсейы Президент æмæ Хицауады стипендиаттæ. Кæд алыхуызон факультетты ахуыр кæнынц, уæддæр сæхи равдыстой æхсæнадон æмæ наукон куысты.
Ацы стипендиты хицæуттæ кæй систы, уый дзурæг у, се ‘нтыстытæн сын аккаг аргъ кæй скодтой, ууыл. Аграрон колледж фæуыны фæстæ Бесолты Аланæ сфæнд кодта аграрон университеты йæ ахуыр адарддæр кæнын æмæ агрономы дæсныйады æппæт сусæгдзинæдтæ базонын. Нырмæ студенткæ ныффыста наукон 50 статьяйæ фылдæр, йæ иртасæн куыстытæ кæны университеты лабораторийы.
Æппæт уыцы æнтыстыты тыххæй Бесолты чызг ссис Уæрæсейы разамынды стипендиаткæ. Уæдæ иннæ студентты дæр сæ ахуыр æмæ наукон архайды, æхсæнадон хъуыддæгты сæрæн бавнæлды тыххæй сбæрæг кодтой ахæм стипендитæй. Дудиаты Дзерассæ дæр аныгъуылд наукон иртасæнты, бæстонæй иртасы сояйы сусæгдзинæдтæ. Инженерон дæсныйадыл хæст æрыгæттæ дæр наукон архайдмæ сты рæвдз.
Борæты Георги ма сывæллон куы уыд, уæд дæр йе ‘ргом здæхта машинæтæм. Афтæмæй, куы райрæзт, уæд равзæрста ахæм дæсныйад – машинæты диссаджы алыхуызон сусæгдзинæдтæ иртасы, наукон цæстæй сæм кæсы. Ныртæккæ Борæйы-фырт у студентты профцæдисты организацийы сæрдар, йæ фидæныл æууæнды.
Ахæм бæрнон стипенди райсыны ис финансон рахæцæн æмæ æрыгон ахуыргæндты æнтыстытæ. Фидæны специалисттæн сæ цуры балæууын у хорз хъæппæрис. Разæй æрыгæттæм æнхъæлмæ кæсы стыр фæллойадон фæндаг, æхцайы фæрæзты
руаджы та сæ бон у наукон архайд кæнын дæр.
Наталья Фрейберг
