РЦИ-Аланийы Парламенты Сæрдар Тускъаты Таймуразæн уыдис фембæлд журналисттимæ. Ныхас цыдис Парламенты афæдзы куыстæн хатдзæгтæ
скæнын æмæ фидæны азы нысантыл.
– 2025 аз кæронмæ фæхæццæ кæны. Æнтыстджын азыл æй нымайын. Нæ республикæйы бирæнацион адæмы системон æмæ бæрнон куысты фæрцы нæ къухы бирæ хорз хъуыддæгтæ сæххæст кæнын бафтыд экономикæ æмæ социалон къабæзты. Нæ бæстæйæн ацы аз уыдис уæлдай зæрдылдаргæ – сбæрæг кодтам Фыдыбæстæйы Стыр хæсты Уæлахизы 80 азы юбилей. Ахæм бинонтæ æмæ хæдзар нæй, хæсты азар кæй нæ басыгъта. Бирæ мадзæлттæ арæзт цыдис Уæлахизы кадæн нæ республикæйы æппæт районты дæр. Адæм сæ истори, сæ уидæгтæ куы зоной, уæд сын æнцондæр у æнгом ахастдзинæдтæ аразын.
Ацы аз фылдæр æргом здæхт цыдис ахуырады фарстатæм. Парламенты æмбырды байхъуыстам, паддзахадон программæ «Ахуырад»-ы нысантæ куыд æххæстгонд цыдысты, уый фæдыл РЦИ-Аланийы ахуырад æмæ наукæйы министр Алыбегты Эллæйы докладмæ. Уымæй уæлдай, хатдзæгтæ скодтам уæлдæр ахуырады уагæвæрдæн, цæй бындурыл арæзт цæуы профориентацион куыст, – загъта Тускъаты Таймураз.
Парламенты Сæрдар фæнысан кодта нæ республикæйы æнæниздзинад хъахъхъæнынады фарстатæ дæр. «Частная медицина» кæй хонæм абон, уый æхсæнадæн бирæ цæлхдуртæ кæй æвзарын кæны, цæрджытæй бирæтæн фадат кæй нæй зынаргъ медицинон лæггæдтæ райсынæн, уый тыххæй хъæуы паддзахадон медицинон куыстуæттæм фылдæр æргом аздахын æмæ сæ æппæт хъæугæ ма-
дзæлттæй дæр сифтонг кæнын. Ныхас цыдис промышленнон æмæ
хъæууонхæдзарадон къабæзты райрæзты бæрæггæнæнтыл, культурæ æмæ спорты æнтыстдзинæдтыл, чысыл æмæ рæстæмбис амалхъомадыл. Тускъайы-фырт куыд загъта, афтæмæй паддзахадон æххуыс цæуы, национ проектты сæрæнæй чи архайы, уыдонæн гранттæ æмæ субсидитæ раттыныл. Ахæм ног
куыстуаты архайд та хъуамæ фондз азы фæстæ бæрзонддæр æмвæзадмæ схиза.
Журналисттæ спикермæ раттой фарст, нæ республикæйы бюджеты фæрæзтæ куыд хардзгонд цæуынц, уый фæдыл.
– Бюджеты хæрдзтæ æрвыст цæуынц социалон къабæзты рæзтæн: культурæ, ахуырад, промышленность, хъæууон хæдзарад, æнæниздзинад, спорт æмæ иннæ ахсджиаг хъуыддæгтæ саразынæн. Нæ бæстæйы Президент 2012 азы майы Указтæ куы бафыста, уæдæй фæстæмæ нæ республикæ уыцы уынаффæтæ бæрнонæй æххæст кæны. Уыцы æхцайы фæрæзтæ дихгонд цæуынц бындурон цалцæг æмæ реконструкцийы куыстытæн. Ахæм объекттæ та Цæгат Ирыстоны бирæ ис. Ис льготæтæ инвестортæн дæр. Сбæрæг кодтам егъау куыстыты пълан æмæ закъоны бындурыл нæ размæ æвæрд нысантæ сæххæст кæныныл архайдзыстæм, – дзырдта дарддæр Тускъаты Таймураз.
Спикер фæнысан кодта, 2026 азы цæуыл кусдзысты, уыцы фарстатæ дæр. Уæрæсейы Федерацийы Президент 2026 аз Иудзинады азыл кæй банымадта, уый бындурыл сын иумæйаг æмбырдтæ уыдзæн Кæсæг-Балхъар æмæ Хъæрæсе-Черкесты республикæты Парламенттимæ.
– Иудзинад вазыгджын мадзал у, канд бæрæг аз нæ, фæлæ кæддæриддæр. Нæ республикæйы цы бирæ адæмыхæттытæ цæры, уыдон кæрæдзийы традицитæ æмæ æгъдæуттæн стыр аргъ кæнынц, ис се ‘хсæн æфсымæрдзинад æмæ хæлар ахастдзинæдты таг, æмæ уый у не стырдæр тых, – загъта Тускъаты Таймураз.
Парламенты Сæрдар радзырдта сæрмагонд æфсæддон операцийы архайджытæ æмæ сæ бинонтæн алывæрсыг æххуыс кæныныл, куысты бынæттæ æмæ реабилитацийы
фарстатыл бæстон архайды тыххæй.
Саутæты Тамилæ
