Нæ республикæйы Хицауады радон æмбырд амыдта йæ Сæрдар Дзанайты Барис. Хицауады уæнгтæ, ведомствæты разамонджытæ сæ хъуыдытæ, сæ фиппаинæгтæ загътой, боны фæткы цы фарстатæ уыдис, уыдæтты тыххæй. Иууылдæр баст уыдысты нæ республикæйы социалон-экономикон рæзтимæ.
Фыццаг уыд кадрты фарста. РЦИ-Аланийы Граждайнаг хъахъхъæнынад æмæ æнæнхъæлæджы уавæрты комитеты сæрдары хæдивæгæй 2028 азы æмгъуыдмæ снысан кодтой Уататы Оледжы.
Ирон æвзаджы нырыккон технологиты проектыл бакуыста РЦИ-Аланийы Ахуырад æмæ наукæйы министрад. Министр Алыбегты Эллæ куыд фехъусын кодта, афтæмæй, сæрмагонд программæ «Ирон адæмы национ-культурон рæзт»-ы бындурыл цы мадзæлттæ арæзт цæудзæн, уыдон баст сты ирон æвзаг цифрон форматмæ раивынимæ, Яндекс æмæ Сбербанкимæ бадзырд бафысгæйæ.
– Республикæйы Хицауад, культурон æмæ æхсæнадон организацитæ иумæйагæй хъуамæ бакусой æвзаджы нырыккон технологитыл. Пъланмæ гæсгæ мыхуыры тексттæ, аудиофыстытæ нырыккон технологиты æххуысæй равдисдзыстæм, «оцифровкæ» кæй хонынц, уыцы хуызмæ, – загъта министр.
Æнæмæнг медицинон фæдзæхстады территорион программæ цæттæгæнæн къамисы номхыгъдмæ дæр ивддзинæдтæ бахастой. 2030 азы онг ацы къабазæн радих кæндзысты 16 миллиард сомы бæрц.
Боны фæткы фарстатыл дзургæйæ, Дзанайты Барис фæнысан кодта, физикон культурæ æмæ спорт адæмы ’хсæн рапарахат кæнынæн, ноджыдæр байгом уыдзæн 11 объекты. Уымæн радих кæндзысты 500 милуан сомы бæрц.
РЦИ-Аланийы фæндæгтыл цы фыдбылызтæ цæуы, уыдонмæ иудадзыг цæстдарæг къорд саразыны тыххæй дзырдта Транспорты комитеты сæрдар Захъаты Алан.
Ацы æмæ фидæны, 2027 азы, Уæрæсейы граждæнтæн райдиан æфсæддон зонындзинæдтæ дæттын астæуккаг æмæ профессионалон ахуыргæнæн уагдæтты, ахуырадон пунктты – ацы фарста рæгъмæ рахаста нæ республикæйы æфсæддон комиссар, булкъон Владимир Скоморах. РЦИ-Аланийы культурæйы министр Гуыдиаты Батрадз æмбырды архайджытæн загъта, Ирыстоны культурон æмæ æхсæнадон цардмæ аккаг æвæрæн чи бахаста, уыдоны нæмттæ сæнусон кæныныл кæй бакуыстой. Хицауады уæнгтæ сразы сты, Адæмон сфæлдыстады хæдзарæн культурæйы зындгонд архайæг Уарзиаты Хадзысмелы ном раттыныл. Нырæй фæстæмæ ахуырадон центр «Эрудит» хæсдзæн Уæрæсейы Хъæбатыр, сæрмагонд æфсæддон операцийы архайæг Мæрзойты Василийы ном. Уæлæмхасæн ахуырады паддзахадон куыстуат «5-æм спортивон скъола»-йæн та раттой, Фыдыбæстæйы Стыр хæсты архайæг, рæстдзæвин Сæлбиты Владимиры ном.
РЦИ-Аланийы финансты министры хæстæ æххæстгæнæг Оксанæ Каровайы ныхасмæ гæсгæ, Беслæны саударæн бонтæ æмбæлгæ уагыл сбæрæг кæнынæн радих кодтой 900 мин сомы.
Æмбырды ма ныхас кодтой æндæр ахсджиаг фарстатыл.
Гугкаты Жаннæ
