0
14

Мадæлон æвзаджы бæрæгбон —Алайнаг гимназы

Дзæуджыхъæуы Алайнаг гимназ у, нæ Ирыстоны кæстæрты ирондзинадыл, æгъдауыл æмæ æфсармыл кæм ахуыр кæнынц, ахæм хъомыладон артдзæст. Ацы æппæт хорзæхты æмрæнхъ сын уарзын кæнынц Цæгат Кавказы æмæ дунейы цæрæг адæмты культурæ.

Мадæлон æвзæгты дунеон бон æмæ Фыдыбæстæ хъахъхъæнæджы бæрæгбæттæм ам арæзт æрцыд литературон-музыкалон композици. Хуынд æм æрцыдысты ЮНЕСКО-йы кафедрæйы ахуыргæнджытæ æмæ ахуырдзауты ныййарджытæ.

Ацы гимназы цы кæстæртæ ахуыр кæны, уыдон радзырдтой ирон, уырыссаг, кæсгон, цæцæйнаг, дагестайнаг, сомихы адæмыхæттытæн сæ хъæбатыр фыртты тыххæй. Азарыдысты сын сæ зарджытæ æмæ сын равдыстой сæ национ хæринæгтæ. Зæрдæмæдзæугæ рауад, зындгонд композитор Ян Френкель æмæ Дагестаны адæмон поэт Расул Гамзатовы фыст зарæг «Хърихъуппытæ»-мæ гæсгæ цы кафт акодтой, уый.

— Нæ сабитæ канд ирон æмæ уырыссаг æвзæгтæ зонынмæ нæ тырнынц, фæлæ ма сæ Цæгат Кавказы цæрæг адæмты æвзæгтæ æмæ культурæ базонын дæр зæрдиагæй фæнды, — дзырдта йæ арфæйы ныхасы Цæгат Ирыстоны педагогон институты ЮНЕСКО-йы кафедрæйы ахуыргæнæг-методист Дзытиаты Эммæ.

Педагогон институты ирон æмæ англисаг филологийы кафедрæйы сæргълæууæг Дзусты Беллæ та йæ арфæйы ныхасы загъта: «Нæ институты ирон æмæ англисаг филологийы хайадæн ацы гимназ у, нырыккон ахуырадон-методикон домæнтæм гæсгæ кæм кусынц, ахæм бындурон ахуырадон артдзæст. Йæ ахуырдзаутæ сæ бæрæгбоны цы курдиат æмæ зонындзинæдтæ равдыстой, уымæй зæрдæ райы. Фидæны дæр ацы кæстæртæ, сæ мадæлон æвзаджы æмрæнхъ, иннæ адæмты культурæ зонынмæ разæнгардæй кæй тырндзысты, ууыл дызæрдыг нæ кæнын». Йæ арфæйы ныхасы фæстæ Беллæ бæрæгбоны архайæг ахуырдзаутæн радта зæрдылдарæн лæвæрттæ.

Гимназы ахуыргæнинæгтæй ирон æвзаджы рæзтимæ баст мадзæлтты зæрдиагдæрæй чи архайдта, уыдоны та йæ сæргълæууæг Цæразонты Мæдинæ схорзæхджын кодта Кады гæххæттытæй.


Гасанты Валери

Къам систа ХЪАЙЫРТЫ Дианæ

 

ОСТАВЬТЕ ОТВЕТ

Please enter your comment!
Please enter your name here