Цæгат Ирыстоны Сæргълæууæджы хæстæ рæстæгмæ æххæстгæнæг Сергей Меняйлойæн кусæг фембæлд уыд республикæйы Хицауады Сæрдары хæдивæджы хæстæ рæстæгмæ æххæстгæнæг, — æнæниздзинад хъахъхъæнынады министры хæстæ рæстæгмæ æххæстгæнæг Годжыцаты Тамерланимæ.
Ныхасы архайджытæ се ‘ргом аздæхтой «тагъд медицинон» æххуысы службæйы архайдмæ, адæмы льготон категоритæн лæвар хостæ дæттынмæ, æнæниздзинад хъахъхъæнынады къабазы кусджытæн мызд фидын æмæ æндæр ахсджиаг фарстатæм.
Республикæйы разамонæг йæ раныхасы куыд фæбæрæг кодта, афтæмæй æнæниздзинад хъахъхъæнынады уагæвæрды æнæкъуыхцы куыст сæйрагдæр фарстатæй иу у. Уыцы æууæл хынцгæйæ, къабазы лыггæнинаг хъуыддæгтæм дарддæр дæр уыдзæн фыццаградон цæстдард.
Боны фæткы фарстатыл дзургæйæ, Сергей Меняйло ведомствæйы разамонæджы æргом аздæхта медицинон кусджытæн мызд фидыны фарстамæ. Республикæйы разамонæг разыйæ нæ баззад, медиктæн мызд цы фæткмæ гæсгæ фыст цæуы, уымæй.
— Мæнмæ гæсгæ, медицинон кусджытæн мызд фидыны хъуыддаджы ис аиппытæ. Дохтыртæн сæрмагонд уæлæмхасæн мызд фидынц сæ профессион дæсныйад æмæ фæлтæрддзинады, стæй стажы тыххæй. Ацы æмæ иннæ фарстатæм лæмбынæг æркæсын хъæуы. Æнæниздзинад хъахъхъæнынады къабазы кусджытæн хъуамæ уа аккаг мызд. Уый хауы, куыд разамонæг специалисттæм, афтæ астæуккаг æмæ кæстæр къæпхæны медицинон кусджытæм дæр, — фæбæлвырд кодта йæ хъуыды Сергей Меняйло.
Уымæй уæлдай, республикæйы разамонæг профилон министры æргом аздæхта, æнæниздзинад хъахъхъæнынады къабазы куысты фæдыл адæм цы хъæстытæ æрвитынц, уымæ дæр. Зæгъæм, тыхст адæм арæх рахъаст кæнынц «тагъд медицинон» æххуысы службæйы куыстæй. Службæйы радхæссæг бригадæтæм бирæ хатт бахъæуы сахатгай æнхъæлмæ кæсын. Рæстæг куыд æвдисы, афтæмæй службæйы хæдтулгæтæ дæр фаг не сты. Æмæ уыцы фарстатæ хъуамæ лыггонд цæуой æвæстиатæй.
Иннæ фарста — æххуысхъуаг адæмæн хостæ дæттын. Рынчын адæмæн хъуамæ афойнадыл æмæ æххæстæй лæвæрд цæуой хъæугæ хостæ. Сæрмагонд æргом аздахын хъæуы, дæрддзæф цæрæн бынæттæм хостæ куыд хæццæ кæнынц, уыцы фарстамæ дæр.
Фембæлды архайджытæ сæрмагонд æргом аздæхтой, фыццаградон национ проект «Æнæниздзинад»-ы уагæвæрдтæ æххæст кæныныл республикæйы цы архайд цæуы, уымæ дæр.
РЦИ-Аланийы
Сæргълæууæджы æмæ Хицауады
пресс-службæ
