Ивгъуыд сабаты Дзӕуджыхъӕуы цы уӕрӕх ӕмбырд уыд, уырдӕм фӕхуыдтой республикӕйы хъӕууон хӕдзарад ӕмӕ хомагкусӕг промышленносты минӕвӕртты. Къабазы хуыздӕр кусджытӕн арфӕ ракодта ӕмӕ хӕрзиуджытӕ радта РЦИ-Аланийы Сӕргълӕууӕг Битарты Вячеслав.
Куыд зонӕм, афтӕмӕй фӕззӕджы ацы афон ахицӕн вӕййы республикӕйы быдырты змӕлдтытӕн сӕ фылдӕр хай, зӕхкусджытӕ сӕ афӕдзы бӕркӕдтӕ нымайын райдайынц… Октябры вӕййы Хъӕууон хӕдзарад ӕмӕ хомагкусӕг промышленносты кусджыты профессион бӕрӕгбон дӕр.
Къабазы кусджытӕн сӕ бӕрӕгбоны фӕдыл арфӕтӕй райдыдта йӕ раныхас Битарты Вячеслав. Республикӕйы Сӕргълӕууӕджы ныхасмӕ гӕсгӕ, Цӕгат Ирыстоны агропромышленнон комплексы кусджытӕн сӕ къухы ӕфты, сӕрбӕрзонд уӕвӕн цӕмӕй ис, ахӕм ӕнтыстдзинӕдтӕ.
«Къабазы ацы азы куысты бӕрӕггӕнӕнтӕ ныфс дӕттынц, хуыздӕрӕрдӕм ивддзинӕдтӕ дарддӕр дӕр фылдӕр кӕй кӕндзысты, республикӕйы агропромышленнон комплекс ноджы хъомысджындӕр кӕй суыдзӕн, уымӕй. Уыцы ӕууӕл та, кӕй зӕгъын ӕй хъӕуы, фидардӕр кӕндзӕн республикӕйы экономикӕ.
Зӕхкусӕг ӕмӕ фосдарӕджы фӕллой ӕнцон никуы уыд, Ирыстоны адӕм сын сӕ куыстӕн алкӕддӕр кад кодтой.
Нӕ фадӕттӕ куыд амонынц, афтӕ архайӕм хъӕууон хӕдзарады райрӕзтыл. Зынгӕ фӕрӕзтӕ дихгонд цӕуынц федералон бюджетӕй дӕр. Фӕлӕ, цасфӕнды ӕхца куы хардз кӕнӕм, уӕддӕр сӕйрагдӕр уыдзӕн, цӕмӕй уыцы фӕрӕзтӕй пайдагонд цӕуа хӕдзардзинӕй. Агропромышленнон комплексы райрӕзтӕн ахъаз сты алыхуызон паддзахадон программӕтӕ дӕр. Нӕ быдыртӕ бӕркадджын куы уой, уӕд йӕхиуыл схӕцдзӕн хомагкусӕг промышленност дӕр. Ӕмӕ кусын хъӕуы афтӕ, цӕмӕй нӕхи быдырты зайой, ныртӕккӕ ӕндӕр регионтӕй цы халсартӕ ӕмӕ дыргътӕ ласӕм, уыдон.
Абон та уал уын бузныг зӕгъын уӕ профессион дӕсныдзинад ӕмӕ уӕ куыстыл ӕнувыддзинады тыххӕй. Уӕ архайд алкӕддӕр ӕнтыстджын куыд уа, уый уын мӕ зӕрдӕ зӕгъы», — фӕнысан кодта Битары-фырт.
Иннӕ хӕттыты куыд вӕййы, афтӕ та ныр дӕр къабазы хуыздӕр кусджытӕ хорзӕхджынгонд ӕрцыдысты республикон паддзахадон хӕрзиуджытӕй.
РЦИ-Аланийы Сӕргълӕууӕджы Указӕй Республикӕ Цӕгат Ирыстон-Аланийы хъӕууон хӕдзарады сгуыхт кусӕджы кадджын ном лӕвӕрд ӕрцыд паддзахадон бюджетон кусӕндон «Севосетинмелиоводхоз»-ы директоры ӕххуысгӕнӕг Виктор Гизатуллин ӕмӕ Цӕрӕгойты низтимӕ тохы дзӕуджыхъӕуккаг станцӕйы къорды хицау Гъуцъунаты Алыбегӕн.
РЦИ-Аланийы Кады грамотӕтӕ райстой: агропромышленнон холдинг «Мастер-Прайм. Березка»-йы цехы кусджытӕ ӕлбегаты Хъазыбег ӕмӕ Тыбылты Фатимӕ, хъӕууонхӕдзарадон фӕлхасадон кооператив «Нива»-йы сӕйраг бухгалтер Еленӕ Болоха, ӕрыдоны районы ӕнӕххӕст бӕрнондзинады ӕхсӕнад «Арлан Фиш»-ы кусӕг Габысаты Артур, хъӕууонхӕдзарадон фӕлхасадон кооператив «Нива»-йы сӕйраг агроном Иван Зирченко, хъӕууонхӕдзарадон фӕлхасадон кооператив «Нива»-йы шофыр Казбек Ибрагимов, куыстадон кооператив «ӕрыдон»-ы механизатор Роман Карамушко ӕмӕ агропромышленнон холдинг «Мастер-Прайм. Березка»-йы скълады хицау Светланӕ Постол.
Зындгонд куыд у, афтӕмӕй ӕрӕджы Цӕгат Ирыстоны агропромышленнон комплексы минӕвӕрттӕ ӕнтыстджынӕй архайдтой ӕппӕтуӕрӕсеон хъӕууонхӕдзарадон равдыст «Сыгъзӕрин фӕззӕг»-ы. Уыцы равдыстмӕ цӕттӕгӕнӕн куысты зӕрдиагӕй кӕй архайдтой, уый тыххӕй РЦИ-Аланийы Кады грамотӕтӕ саккаг кодтой Цӕгат Ирыстоны Равдыстыты ӕмӕ презентациты архайды фӕдыл республикон фонды директор Сокаты Марат ӕмӕ йӕ фыццаг хӕдивӕг Калоты Константинӕн.
Къабазы кусджытӕн бӕрӕгбоны арфӕтӕ ракодта ӕмӕ сын ведомствӕйон хӕрзиуджытӕ радта республикӕйы хъӕууон хӕдзарад ӕмӕ хойраджы министр Уазиты Хъазыбег дӕр.
Фӕстӕдӕр хъӕууон хӕдзарады кусджыты кадӕн стыр концерт равдыстой республикӕйы сфӕлдыстадон коллективтӕ.
РЦИ-Аланийы Сӕргълӕууӕджы ӕмӕ Хицауады пресс-службӕ
