РЦИ-Аланийы Сӕргълӕууӕг Сергей Меняйлойы разамындӕй уыд республикӕйы Хицауады уӕнгтӕ ӕмӕ муниципалитетты разамонджыты иумӕйаг ӕрвылкъуыриуон ӕмбырд. Фембӕлды архайджытӕ хатдзӕгтӕ скодтой ивгъуыд къуырийы куыстытӕн, стӕй фӕбӕрӕг кодтой ӕрвылбоны архайды хӕстӕгдӕр нысантӕ.
Ӕмбырд райдыдта кадрты фарстайы тыххӕй хъусынгӕнинагӕй. Сергей Меняйло куыд фехъусын кодта, афтӕмӕй Моргуаты Константины йӕхи куырдиатмӕ гӕсгӕ суӕгъд кодта республикӕйы арӕзтад ӕмӕ архитектурӕйы министры бынатӕй. Уыимӕ, Моргуайы-фырт йӕ куыст адарддӕр кӕндзӕн РЦИ-Аланийы Сӕргълӕууӕджы уынаффӕгӕнӕджы бынаты. Иннӕ уынаффӕйӕ Цӕгат Ирыстоны арӕзтад ӕмӕ архитектурӕйы министры хӕстӕ рӕстӕгмӕ ӕххӕстгӕнӕгӕй нысангонд ӕрцыд Атараты Георги.
Дарддӕр ӕмбырды раныхас кодта Цӕгат Ирыстоны Хицауады Сӕрдары хӕдивӕг Томайты Ирбег. Хицауады Сӕрдары хӕдивӕджы ныхасмӕ гӕсгӕ, ивгъуыд къуырийы дӕргъы республикӕйы ӕнӕнхъӕлӕджы цаутӕ регистрацигонд не ‘рцыд. Уыимӕ, синоптикты рагагъоммӕ бӕрӕггӕнӕнтӕм гӕсгӕ, ацы бонты дӕр республикӕйы хицӕн районты тӕссаг у тыхджын къӕвдатӕ ӕмӕ ихуарынтӕй. Уыцы ӕууӕл хынцгӕйӕ, алыхуызон ӕнӕнхъӕлӕджы цаутӕ ма ‘руадзын ӕмӕ ӕрдзон фыдбылызты фӕстиуджытӕ иуварс кӕныны паддзахадон системӕйы дӕлхайӕдтӕ ацы бонты сӕ куыст аразынц уӕлдай цӕттӕдзинады фӕткы бындурыл. Томайы-фырты ныхасмӕ гӕсгӕ, Мӕздӕджы, Рахизфарсы ӕмӕ Горӕтгӕрон районты та йӕ тыхы ис ӕрдзон зынгсирвӕзтытӕй ӕдасдзинады сӕрмагонд фӕтк.
Дарддӕр ӕмбырды раныхас кодта Цӕгат Ирыстоны ӕнӕниздзинад хъахъхъӕнынады министр Тебиаты Сослан. Министры хъусынгӕнинагмӕ гӕсгӕ, республикӕйы стационарты ныртӕккӕ дзӕбӕх кӕнынц 3 741 рынчыны. Фӕстаг рӕстӕг ахадгӕдӕр кӕны цӕугӕ медицинон комплексты архайд. Зӕгъӕм, 2023 азы райдайӕнӕй нырмӕ цӕугӕ медицинон комплекстӕ сӕрмагонд графикты бындурыл сӕ куыст кӕнынц республикӕйы муниципалитетты. Азы фыццаг ӕмбисы дӕргъы уыцы комплексты специалистты лӕггӕдтӕй спайда кодтой 18 мин адӕймагӕй фылдӕр. Тагъд медицинон ӕххуысы станцӕйы куысты тыххӕй дзургӕйӕ, Тебиайы-фырт куыд бафиппайдта, афтӕмӕй ивгъуыд къуырийы дӕргъы 4 минӕй фылдӕр ӕххуысхъуаг адӕммӕ ацыдысты станцӕйы радгӕс къордтӕ. Ӕмткӕй райсгӕйӕ, Тагъд медицинон ӕххуысы станцӕйы дӕлхайӕдты кусынӕввонг сты 65 бригады.
Ӕмбырды архайджытӕ се ‘ргом аздӕхтой паддзахадон нысаниуӕджы ӕлхӕнинӕгтӕ кӕныны системӕйы куысты дарддӕры нывыладмӕ дӕр. Афтӕ, республикӕйы финансты министры хӕстӕ ӕххӕстгӕнӕг Исахъты Олег куыд радзырдта, афтӕмӕй Финансты министрады цур ахадгӕ куыст кӕны Паддзахадон ӕлхӕнинӕгтӕ кӕныны системӕйы автоматизацигонд центр. Йӕ специалистты фӕрцы ӕргомдӕр ӕмӕ бӕстондӕр кӕны амынд нысаниуӕджы ӕлхӕнинӕгтӕ кӕныны куыст. Зӕгъӕм, ӕрмӕст июны амынд системӕйы фидаргонд ӕрцыд 64 бадзырды 12,4 милуан сомы аргъӕй. Уыимӕ, ног центры авналӕнтӕй пайда кӕнгӕйӕ, фӕстауӕрцгонд ӕрцыдысты паддзахадон фӕрӕзты 956 мин сомы.
— Кӕй зӕгъын ӕй хъӕуы, уыцы фӕлтӕрддзинад фӕахадгӕдӕр кӕнын хъӕуы, цӕмӕй паддзахадон нысаниуӕджы ӕлхӕнинӕгты фӕдыл бадзырдтӕн сӕ фылдӕр фидаргонд цӕуой ацы автоматизацигонд системӕйы фӕрцы, — амынд бӕрӕггӕнӕнтӕ хорзыл банымайгӕйӕ, бафиппайдта Сергей Меняйло.
Республикӕйы разамонӕг йӕ раныхасы сӕрмагондӕй ӕрдзырдта, бынӕттон товаруадзджытӕн паддзахад цы уӕлӕмхасӕн ӕххуысы мадзӕлттӕ аразы, уыдоныл. Йӕ ныхасмӕ гӕсгӕ, профилон ведомствӕтӕ хъуамӕ ӕххӕстӕй хӕццӕ кӕной амалхъомтӕ ӕмӕ промышленнон товаруадзджытӕм уыцы аудӕн мадзӕлтты тыххӕй ӕппӕт информаци дӕр.
— Рӕстӕг куыд ӕвдисы, афтӕмӕй амалхъомтӕ ӕмӕ товаруадзджытӕн сӕ иу хай ахӕм паддзахадон ӕххуысы мадзӕлтты фӕтк зонгӕ дӕр нӕ фӕкӕнынц. ӕмӕ, кӕй зӕгъын ӕй хъӕуы, пайда дӕр сӕ не скӕнынц. Уыцы уавӕр цӕхгӕр фӕивын хъӕуы, цӕмӕй алкӕцы товаруадзӕг дӕр бӕстон зона, паддзахад ын цавӕр уӕлӕмхасӕн ӕххуысӕй зӕрдӕ ӕвӕры, уый, — бацамыдта Сергей Меняйло.
Республикӕйы Сӕргълӕууӕг сӕрмагонд амынддзинад радта республикӕйы экономикон рӕзты министр Кучиты Зауырӕн, цӕмӕй ведомствӕ федералон базарадон хызӕгтимӕ ӕмархайд фенгомдӕр кӕна. Уый фӕрцы бынӕттон товаруадзджытӕн уӕрӕхдӕр фӕндаг уыдзӕн, ӕрмӕст хи республикӕйы нӕ, фӕлӕ иннӕ регионты базартӕм дӕр. Кучийы-фырт куыд фехъусын кодта, афтӕмӕй министрад амынд базарадон хызӕгтимӕ ӕмгуыстад уӕрӕхдӕр кӕныныл архайы, сӕ фылдӕримӕ ныридӕгӕн фидаргонд ӕрцыдысты сӕрмагонд бадзырдтӕ.
РЦИ-Аланийы Хицауады Сӕрдары фыццаг хӕдивӕг Ӕгъуызарты Мураты раныхас та баст уыд, хаццоны цы республикон зӕххытӕ ис, уыдонӕн арендон фиддонтӕ куыд ӕмбырдгонд цӕуынц, уыимӕ. Ӕгъуызары-фырты ныхасмӕ гӕсгӕ, ныртӕккӕ республикӕйы ӕппӕт районты дӕр арендон фиддонтӕ афойнадыл ӕмбырдгонд цӕуынц. Фӕлӕ, 2019-2023 азты зӕххыты кадастрон аргъ иуцасдӕр кӕй фӕкъаддӕр, уымӕ гӕсгӕ амынд азты республикӕйы бюджетмӕ нал фӕхӕццӕ 260 милуан сомы бӕрц.
Уыцы нымӕцтыл дзургӕйӕ, Сергей Меняйло профилон ведомствӕты минӕвӕрттӕн бахӕс кодта, цӕмӕй бӕстон раиртасой, зӕххыты кадастрон аргъ цӕмӕн фӕкъаддӕр, уый. «Паддзахадон исбонад ӕмӕ зӕххы ахастдзинӕдты фарстаты фӕдыл министрады специалисттӕ хъуамӕ бӕлвырд дзуапп радтой: иу кӕнӕ иннӕ зӕххы хайы кадастрон аргъ кӕнынӕн цавӕр бындур уыд? Уымӕй уӕлдай, министрад ӕмӕ иннӕ профилон ведомствӕты минӕвӕрттӕ зӕххы хӕйтты хицӕуттӕ ӕмӕ арендатортӕн хъуамӕ ӕмбарын кӕной ахӕм ӕууӕл: арӕх уынаффӕтӕ хаст ӕрцӕуы иуӕй-иу зӕххытӕ паддзахады пайдайӕн балхӕнын, ӕмӕ уӕд ӕргътӕ дӕр, кӕй зӕгъын хъӕуы, кадастрон гӕххӕттыты бындурыл нымад ӕрцӕуынц. Уый та алкӕцы уӕйгӕнӕджы зӕрдӕмӕ нӕ фӕцӕуы. ӕмӕ уӕд сӕ хъуыддӕгтӕ тӕрхондонмӕ дӕттын райдайынц», — фӕбӕрӕг кодта Сергей Меняйло.
Зындгонд куыд у, афтӕмӕй бирӕфатерон цӕрӕн хӕдзӕртты бындурон цалцӕджы республикон программӕйы фӕлгӕты 2025 азы онг хъуамӕ ивд ӕрцӕуой 210 лифты. Профилон ведомствӕты минӕвӕртты хъусынгӕнинагмӕ гӕсгӕ, ныридӕгӕн ӕвӕрд ӕрцыдысты 44 лифты. Азы кӕронмӕ ма уыдоныл бафтдзӕн ноджыдӕр 50 лифты. Амынд хъусынгӕнинагӕн хатдзӕгтӕ кӕнгӕйӕ, Сергей Меняйло бахӕс кодта, цӕмӕй программӕйы уагӕвӕрдтӕ цыбырдӕр ӕмгъуыдтӕм ӕххӕстгонд ӕрцӕуой.
Фӕстаг бонты Горӕтгӕрон районы ӕрхонкӕйы станицӕйы цӕрджытӕ иуцасдӕр зындзинӕдтӕ ӕвзӕрстой, нуазыны дон сӕм фагӕй кӕй нал хӕццӕ кодта, уымӕй. Уыцы уавӕрыл дзургӕйӕ, республикӕйы цӕрӕнуатон-коммуналон хӕдзарады, артаг ӕмӕ энергетикӕйы министр Таматы Майрӕн куыд фехъусын кодта, афтӕмӕй цалцӕггӕнӕг бригадты архайды фӕрцы донӕфсисады хъуагдзинӕдтӕ иуварсгонд ӕрцыдысты.
Ӕмбырды кӕронбӕттӕны Сергей Меняйло профилон республикон ведомствӕты разамонджыты ӕргом аздӕхта, ацы азы арӕзтад ӕмӕ цалцӕджы пълантӕм цы ахсджиаг социалон объекттӕ хаст ӕрцыд, уыдоны уавӕрмӕ. Йӕ ныхасмӕ гӕсгӕ, амынд объектты арӕзтад ӕмӕ цалцӕгмӕ хъуамӕ уа фыццаградон цӕстдард, ӕппӕт графиктӕ дӕр хъуамӕ ӕххӕстгонд цӕуой афойнадыл.
РЦИ-Аланийы Сӕргълӕууӕджы ӕмӕ Хицауады пресс-службӕ
