Низ цас раздæр сбæрæг кæной, уыйас æнцондæр дзæбæхгæнæн у, фæзæгъынц дохтыртæ. Уыцы хъуыдыимæ Æрыдоны районы хъæутæм, сæрмагонд графикмæ гæсгæ, цæуынц флюорограф æмæ маммограф машинæтæ. Ацы бонты æрлæууыдысты Хъæдгæроны, амбулаторийы цур. Национ проект «Æнæниздзинад»-ы бындурыл ахæм лæггад тынг æхсызгон хъæуы тæссаг низтæй хи бахъахъхъæнынæн. Нырыккон мобилон комплекс схонæн ис цæлхытыл рентген-кабинет. Райсом раджы адæм цæуын райдыдтой, – фылдæр хистæр кары адæм.
– Тынг хорз у, ахæм медицинон лæггад кæй ис, уый. Дохтыры амындмæ гæсгæ скодтон флюорографи. Районы рынчындонмæ цæуын мæ нал бахъуыд, – загъта Гагуылаты Хъазыбег.
– Районы алы хъæумæ дæр цæуæм сæрмагонд графикмæ гæсгæ. Медицинон кусджытæ рагагъоммæ фехъусын кæнынц адæмæн. Хъыгагæн, ныртæккæ арæх у тарниз, хи бахъахъхъæнынæн афæдз иу хатт флюорографи æнæмæнгæй хъæуы кæнын. Нырыккон аппаратты пленкæ нæй, хуызист уайтагъд цæуы электронон базæмæ, уый фадат дæтты цыбыр рæстæгмæ уавæр сбæлвырд кæнынæн, – загъта рентген-лаборант Мсойты Дианæ.
Хъæуы цæрæг сылгоймæгты удæнцойдзинадæн, стæй тæссаг онкологон низтæй хи бахъахъхъæнынæн сæ дохтыртæ æрвитынц маммографи кæнынмæ.
– Нырыккон рентген кусæнгæрзтæ тæссаг не сты, фæлæ æххуыс сты низ афойнадыл рабæрæг кæнынæн. 40 азæй хистæртæ – дыууæ азы иу хатт, 50 азæй – афæдз иу хатт хъуамæ се ’нæниздзинад бæрæг кæной.
Ацы профилактикон мадзал æрмæстдæр цалдæр минуты цæуы. Радиацийы тынтæй хи бахъахъхъæнынæн дзы ис сæрмагонд кабинæ. Нæ куысты тыххæй арæхдæр арфæйы ныхæстæ хъусæм, фæлæ йын аргъ чи нæ кæны, йæ ахадындзинад чи нæ æмбары, ахæмтæ дæр вæййы, – дзуры рентген-лаборант Туаты Сæлимæ.
Дианæ æмæ Сæлимæ нырма æрыгон чызджытæ сты. Дзæуджыхъæуы медицинон колледж æнтыстджынæй каст фесты, кусынц Æрыдоны районы рынчындоны. Сæ равзæрст дæсныйадыл сты æнувыд.
Гугкаты Жаннæ
