Ацы бонты Дзӕуджыхъӕуы цӕуы, цалдӕр регионы минӕвӕрттӕ кӕм архайынц, ӕвзонг музыкантты уыцы конкурс «Нӕ ныфсытӕ».
Куыд иннӕ азты, афтӕ ныр дӕр музыкӕйы бӕрӕгбонӕн фадӕттӕ сарӕзтой Дзӕуджыхъӕуы бынӕттон хиуынаффӕйады администраци ӕмӕ горӕты Петр Чайковскийы номыл сывӕллӕтты 1-ӕм музыкалон скъолайы разамынд.
Ӕвзонг музыкантты ерыстӕ цӕуынц цалдӕр номинацийы: фортепиано, адӕмон инструменттӕ, зарӕг ӕмӕ афтӕ дарддӕр. Конкурс ныр арӕзт цӕуы ӕстдӕсӕм хатт.
Сфӕлдыстадон ерысы архайджытӕн арфӕ ракодта Дзӕуджыхъӕуы бынӕттон хиуынаффӕйады администрацийы культурӕйы управленийы разамонӕг Мӕрзойты Руслан.
Петр Чайковскийы номыл музыкалон скъолайы директор Козаты Заремӕ йӕ раныхасы куыд фӕбӕрӕг кодта, афтӕмӕй конкурсӕн бындур ӕвӕрд ӕрцыд 1997 азы. Фыццаг хатт ӕй сарӕзтой скъолайы ӕмвӕзадыл, уӕдӕй нырмӕ йӕ архайджыты нымӕц зынгӕ фӕфылдӕр ӕмӕ сси, цалдӕр регионы минӕвӕрттӕ сӕ арӕхстдзинад кӕм ӕвдисынц, ахӕм сфӕлдыстадон ерысы фӕз. Зӕгъӕм, ацы аз конкурсантты нымӕц 200 адӕймагӕй фылдӕр у (уыдон сты музыкалон ахуырады 24 алыхуызон кусӕндоны минӕвӕрттӕ).
Ӕвзонг музыкантты арӕхстдзинадӕн аргъгӕнӕг у, бирӕ зындгонд специалисттӕ кӕй сконды кусынц, уыцы жюри. Жюрийы уӕнг — Цӕгат Ирыстоны Композиторты цӕдисы сӕрдар, УФ-йы аивӕдты сгуыхт архайӕг Махъоты Ацӕмӕз куыд зӕгъы, афтӕмӕй Ирыстонӕн ахсджиаг у ацы конкурс, уымӕн ӕмӕ ирдӕй ӕвдисы республикӕйы музыкалон ахуырады уавӕр.
Хӕстӕгдӕр рӕстӕг сбӕрӕг уыдзысты конкурсы уӕлахиздзаутӕ ӕмӕ лауреаттӕ.
Нӕ уацхӕссӕг
