Таиландаг бокс нæ республикæйы кæд рагæй зындгонд нæу, уæддæр нæм ныридæгæн ис, стыр ерысты æнтыстджынæй чи тох кæны, ахæм фæсивæд. Зæгъæм, Тулойты Владимирæн бантыст Европæйы Кубок рамбулын. Уымæй уæлдай ма нæ кæстæр фæсивæд къордæй æвдисынц хорз бæрæггæнæнтæ, Цæгат Кавказы æмæ æндæр рæтты цы бæрнон ерыстæ вæййы, уым.
Ивгъуыд къуыри Дзæуджыхъæуы Фæсивæды Галуаны сценæйы цы ринг æвæрд æрцыд, уым Цæгат Ирыстоны фыццаг бынат бацахсыныл ерыс кодтой сæдæ лæппуйы æмæ чызджы. Таиландаг бокс дæрзæг спорты хуыз кæй у, уый тыххæй спортсментыл конд вæййы сæрмагонд хихъахъхъæнæн дарæс. Ноджы ма, цæмæй æрыгон фæсивæд уæззау цæфтæй хызт уой, уый тыххæй дихгонд сты, сæ кармæ гæсгæ, цалдæр къордыл. Бафиппайын хъæуы уый дæр, æмæ ардæм хуынд кæй æрцыдысты Дагестан æмæ Цæцæны республикæты боксертæ дæр. Цæгат Ирыстоны Таиландаг боксы федерацийы президент Геннадий Мартиросов куыд зæгъы, афтæмæй æндæр республикæйы минæвæртты æрбахуынд пайда у фæсивæды дæсныдзинады рæзтæн. Æмæ æцæгæй дæр, ерысты цы тохтæ уыд, уыдонæн сæ цымыдисагдæртæй иутæ уыдысты: цæцæйнаг боксер Абукар Висингереев æмæ Дзанайты Тимуры тох (ацы хъазуатон тохы фæуæлахиз Дзанайы-фырт), мæздæггаг Эльдар Хасанов æмæ цæцæйнаг боксер Арби Юсуповы (фæуæлахиз Юсупов), Владимир Мамонтов (Цæцæны Республикæ) æмæ Мерденты Алыбеджы (фæуæлахиз Мерденыфырт), Тадтаты Константин æмæ Мансур Чергисбиевы (Цæцæны Республикæ). Ам фæуæлахиз Чергисбиев. Тынг цымыдисаг тох цыди Хæныкъаты Тимур æмæ цæцæйнаг боксер МагомедРасул Балтукаевы ‘хсæн дæр. Ацы тохы ирыстойнаг богал равдыста хорз техникон æмæ физикон цæттæдзинад æмæ фæуæлахиз йæ тыхджын ныхмæлæууæгыл. Æппæты кæстæрты (6-7аздзыд) ерысты 1-аг бынатмæ рацыд дагестайнаг лæппу Раджаб Магомедов (28 кг онг уæзы). Цымыдисаг тох кодтой чызг-боксертæ дæр. Нымæцæй кæд бирæ нæ уыдысты, уæддæр спортуарзджыты зæрдæмæ сæ хæст фæцыди. Кристинæ Лесняк, Виктория Тиликова, Цхуырбаты Дарья, Дзускъаты Фатимæ æмæ Агънаты Тамарæ равдыстой уæлахизмæ тырнындзинад. РЦИ-Аланийы ацы азы фыццаг бынат бацахсджытæ систы: 6-7 азы кары — Даниил Водонаев (22 кг), Уалыты Тамерлан (26 кг), Даниил Еремин (24 кг), Раджаб Магомедов (28 кг, Дагестан), Алешæ Бочков (30 кг). 8-9 азы кары: Дмитрий Двадненко (24 кг), Никитæ Матяш (26 кг), Хæныкъаты Алик (28 кг), Абдул-Рахман Дудуев (32 кг, Цæцæны Республикæ). 10-11 азы кары: Магомед Мусхаджиев (30 кг), Тимур Умашев (34 кг), Цæрикъаты Альберт (36 кг), Козаты Родислав (42 кг), Магомед Джамбулатов (44 кг, Цæцæны Республикæ), Артур Богосян (60 кг). 12-13 азы кары уæлахиздзаутæ систы: Хамзат Хадисов (36 кг), Марданты Хох (38 кг), Хæныкъаты Хъазыбег (38 кг, д.к.»В»), Даниил Соседский (40 кг), Ильяс Гаджиев (42 кг), Абæгаты Альберт (46 кг), Дзбойты Артур (48 кг), Мæргъиты Руслан (54 кг), Николай Джамоев (56 кг), Уыртаты Арсен (58 кг). 14-15 азы кары 1-аг бынæттæ бацахстой: Бегты Алан (54 кг), Давид Коробейников (57 кг), Адам Кефер (63,5 кг), Руслан Шихаев (67 кг), Саламты Алан (71 кг), Хæныкъаты Тимур (75 кг). 16-17-аздзыд спортсменты ерысы 1-аг бынæттæм рацыдысты: Даниил Кенкадзе (60 кг), Дзанайты Тимур (63,5 кг), Даттеты Алан (67 кг), Такъæты Сослан (91 кг). РЦИ-Аланийы Таиландаг боксы федерацийы президент Геннадий Мартиросов уыди ерысты сæйраг тæрхонгæнæг æмæ загъта: «Ерыстæ, мæнмæ гæсгæ, æвзæр нæ рауадысты. Дыууæ боны дæргъы залы цы бирæ адæм уыди, уыдон æнкъард кæнын нæ бауагътой нæ боксертæ. Цæцæн æмæ нæм дагестайнаг уазджытæ кæй уыд, уый дæр хуыздæрæрдæм фæзынд нæ ерыстыл. Æз бузныг зæгъын нæ республикæйы Физкультурæ æмæ спорты министрадæн, Фæсивæды Галуаны кусджытæн, дохтыртæн æмæ сæрмагондæй нæ республикæйы Парламенты депутат Уататы Зелимæн, нæ фарсмæ кæй æрбалæууыдысты, уый тыххæй. Ныр нæ фæсивæды цæттæ кæндзыстæм Цæгат Кавказы федералон зылды ерыстæм».
БАСКАТЫ Уырызмæг Авторы ист къам
