Мах дæр рæвдз стæм
Ставд-Дуртæ. Нæ кусæнгæрзтæ: гутонæй, похцийæ æмæ æндæрæй рæвдзгонд фесты. Нæ кусæг фосæй уалдзæджы кусынмæ чи рацæудзæн, уыдонæн сарæзтам бынæттæ. Холлагæй ма кæмæ цы уыди, уыдон дæр æмбырдгонд фесты.
Т.С.
Газет «Рæстдзинад» 1930 аз,
16 мартъи №62 (560)
Нæ кусæнгæрзтæ сцалцæг кодтам
Змейкæ. Кусæнгарзæй нæм цы ис: тракторæй, гутонæй, похцийæ, валокæй æмæ æндæрæй, уыдон сцалцæг кодтам. Ныр та кусæм кусæг фосæн холлаг æрæмбырд кæныныл, цæмæй нæ уалдзæг æдзæттæйæ ма æрæййафа.
Саулæг
Газет «Рæстдзинад» 1930 аз,
16 мартъи №62 (560)
Куыст нæм хорз цæуы
Ног Саниба. Нартхоры тауинагæй æрæмбырд кодтам 98 проценты, ныртæккæ йæ сыгъдæг кæнæм. Холлаг æрæмбырд кодтам 133 тоннæйы, нæ кусæнгæрзтæн сцалцæг кодтам сæ 45 проценты. Уымæн æмæ нæм ныронг куыста 2 кусæджы техникæ цалцæг кæныны тыххæй. Фæлæ ныр сты 8 кусæджы æмæ сæ куыст рæвдздæр цæуы. Æхсæнадон фосæн æрцæттæ кодтам 4 скъæты.
Хъæу дихгонд æрцыд 6 хайыл. Уыдонæй 5 хайы кæндзæн быдыры куыст, иу та — дыргъдоны æмæ цæхæрадоны куыстытæ. Бригæдтæн равзæрстам хистæртæ. Куыст та къуылымпы кæндзæн, кусæг фосæн нæм цъата æмæ нæмыг фаг кæй нæй, уый тыххæй.
Бимболат
Газет «Рæстдзинад» 1930 аз,
16 мартъи №62 (560)
Фæсмон сæм æрцыд
Быдыры Дæргъæвсы цæрджытæ Рæмонаты Сип, Мамсыраты Бечыр, Сугъараты Елбыздыхъо, Рæмонаты Дзибпа æмæ Мамсыраты Дрис цъулберты ныхæстæм байхъуыстой æмæ рацыдысты колхозæй. Ныр, куы бакастысты колхозы куыстмæ, уæд фæстæмæ курдиæттæ балæвæрдтой, цæмæй сæ фæстæмæ колхозмæ райсой, æмхуызонæй дæр зæгъынц, цъулберты зондæй кæй фæрæдыдысты, уый.
Похци
Газет «Рæстдзинад» 1930 аз,
6 апрель №79 (547)
Цы пайда у ахæм агроном?
Иран. Дыгуры зылд Иран æмæ СтавдДуртæм æрæрвыста агроном Иван Поборчийы. Фæлæ дзы Иранæн ницы пайда ис, мæй нæм кæд иу хатт фæзыны, уæд хорз. Уымæй дæр куыстытæн амонгæ ницы бакæндзæни. Исты йын куы зæгъай, уæд дыл фæхъæр кæндзæн: «Æз мæхæдæг мæхицæн — хицау, мæнæн уынаффæгæнæг мачи уæд!»
Нæ колхозы куыстытæн нырма иу сæрфат нæма ис. Нæй нæм бригæдтæ æвзæрст, колхозонтæн зындгонд нæу, чи цы куыст кæндзæн, уый. Ныртæккæ дзы чи кусы колхозы уæнгтæй, уыдон дæр ницы зонынц сæ куыстæн, ницы пълан ис. Афтæ куыстæй дард нæ ацæудзыстæм. Дыгуры зылд, цæмæ нæм æрæрвыстат агроном Иван Поборчийы, нæ куыстытæн нын нырма иу пълан куы нæ скодта, уæд?
Уацхæссæг
Газет «Рæстдзинад» 1930 аз,
16 мартъи. №62 (560)
Дзуарыхъæу сиды Ногир æмæ Хъæдгæроны скъолатæм
Дзуарыхъæуы авдазон скъола тынг цæттæ кæны уалдзæджы куыстытæм. Йæ тауинæгтæ нартхор, картоф æмæ лыстæг халсартæ йын цæттæ сты. Скодтам парниччытæ, ныссагътам сæ къабуска, пъамидор, цывзы æмæ æндæртæ. Скъоладзаутæ дихгонд æрцыдысты бригæдтыл. Уыдонæй чи хуымы куыст кæндзæн, чи цæхæрадоны, чи та æндæр.
Уæдæ, колхозы дæр кæм бахъæуæм, уым ын æххуыс кæнæм, тауинаг æмбырд кæнгæйæ, тауинаг æвзаргæйæ, æмæ æндæр ахæм куыстыты.
Ацы уалдзæг хъуамæ бакæнæм 4 дæсæтины нартхор, 2 дæсæтины картоф. Нæ куыстытæ рæвдздæр ацæуыны тыххæй ерысæй фæсидтыстæм Ногир æмæ Хъæдгæроны скъолатæм. Æнхъæлмæ сæм кæсæм.
Бесаты лæппу
Газет «Рæстдзинад» 1930 аз,
23 мартъи №67 (535)
Уалдзæг нæ æдзæттæйæ æрæййафдзæн
Заманхъул. Нæ гутæттæ, похцитæ бæргæ æрæмбырд кодтам, стæй сæ цалцæг дæр кæнæм, фæлæ иннæ кусæнгæрзтæ: хамуттæ, валоктæ æмæ æндæртæ нырма æмбырдгонд дæр не сты, сæ кой дæр ничи кæны, æнæ уыдон срæвдзæй та хуым кæнæн нæй. Кусæг фос æппæтæй дæр сты иумæйаг скъæтты. Нырма йæ кусæг фос йæхимæ кæмæн сты, уыдон сыл æппындæр нал ауæрдынц, кусынц сыл æмæ сын холлаг нæ дæттынц, кæйдæры цæстæй сæм акастысты, афтæмæй кусæг фосы сæфтмæ тæрынц. Арæх нæм гутон фæкæнынц галтæй дæр, афтæмæй та уыдонæй йæ хъуыдыйы дæр никæмæ ис æхсæны скъæттæ аразыны фæнд. Кусæг фос ауагътой быдырмæ æмæ сæ тæригъæдæй марынц. Нæ колхозы правлени рагацау куы нæ бакуса ацы хъуыддæгтыл, уæд нæ уалдзæг æдзæттæйæ æрæййафдзæн.
Зонæг
Газет «Рæстдзинад» 1930 аз,
16 мартъи №62 (560)
Æрмæджытæ мыхуырмæ бацæттæ кодта ТОХСЫРТЫ Къоста
